​A Xunta esgrime o aforro económico para xustificar a privatización da loita contra o lume

A Xunta recoñece abertamente que este ano ten contratado empresas privadas para labores de prevención de incendios en lugar de dar máis carga de traballo á pública Seaga. Pero non cree estar cometendo un erro, xa que asegura que as tarifas de Seaga "non son máis baratas".

Así o defendeu o director xeral de Ordenación e Produción Forestal, Tomás Fernández-Couto, que asegurou en comisión parlamentaria que "non sempre os traballos da administración son os máis baratos nin os máis eficaces", explicando "non é máis caro contratar fóra que por Seaga". "Non entendo ese empeño de que é máis barato facer con brigadas de empresas públicas os traballos", sentenciou.

Neste senso, asegura que a Xunta realizou 48 expedientes de obra menor, "publicados na plataforma de contrato de Galicia", que recibiron 1.976 ofertas de diferentes empresas, con "transparencia". Así mesmo, Fernández-Couto afirma que se conseguiu unha redución media do 38% no custo das actuacións, que se centran en empregar maquinaria para traballos cos que "se multiplican" as hectáreas sobre as que se actúan.

Todos estes argumentos respondían a unha pregunta de AGE na que Antón Sánchez acusou á Xunta de "privatización" dos servizos contraincendios, coa adxudicación de máis de 100 contratos polo procedemento "negociado sen publicidade" para limpeza de montes, rozas e melloras en pistas por "varios millóns".

Todo iso, mentres "ten unha empresa pública especializada" nestes labores, cuxos empregados "levan anos reivindicando máis carga de traballo". Segundo denuncia Antón Sánchez, a Xunta elixe a privatización "sen que haxa ningunha xustificación", á vez que "se recorta a posibilidade de consolidarse como traballadores do sector público" aos empregados de Seaga que traballan "uns tres meses" ao ano.

PROPOSTA SOBRE SEAGA REXEITADA

Como consecuencia, o grupo popular volveu rexeitar unha iniciativa do BNG apoiada polo resto da oposición, na que se reclamaba incrementar a carga de traballo de Seaga  a través da ohibición de subcontratas, co fin de que os traballadores teñan un período mínimo de traballo efectivo de seis meses ao ano.

Así mesmo, a iniciativa denegada tamén pedía reorientar a política de prevención de incendios forestais, co obxectivo de evitar unha sobrecarga no período de alto risco.

Durante o debate, Tereixa Paz (BNG) arremeteu contra a Xunta por "privatizar" a xestión de traballos forestais, con traballadores de Seaga "no paro e en casa durante nove meses", á vez que acusou ao Goberno galego de "unha actuación premeditada" para unha "descapitalización" da empresa pública.

Neste sentido, Pablo García (PSdeG) criticou que a Xunta "durante sete anos quería eliminar esta empresa pública", mentres fomenta as brigadas municipais, que "son as que máis recursos reciben para extención de incendios". Unha xestión do PP contra o lume que considera "menos eficaz e operativa", e que é "moito máis cara".

Durante o debate desta iniciativa, Antón Sánchez (AGE) censurou que a Xunta xestiona de "forma vergoñosa" os traballos contraincendios, nos que "gasta cada vez máis" para que empresas "fagan negocio".

Pola súa banda, César Fernández (PP) explicou a negativa do seu grupo sinalando que esta é unha "iniciativa reiterada ao longo do tempo", polo que os populares non van cambiar a súa posición.