​O 061 atendeu máis de 100 persoas esta fin de semana por accidentes de tráfico

O servizo de Urxencias Sanitarias de Galicia atendeu un total de 107 persoas esta fin de semana debido a 73 accidentes de circulación nas estradas galegas, que se saldaron con tres falecidos.

Segundo informou o 061 a través dun comunicado, os servizos de emerxencia realizaron 73 asistencias sanitarias derivadas das 82 chamadas xestionadas pola Central de Coordinación de emerxencias.

Pontevedra foi a provincia que máis incidentes rexistrou entre o venres e o domingo, con 28 sinistros. Doutra banda, un 26% dos accidentados tiñan idades comprendidas entre os 20 e os 34 anos.

En total, os medios mobilizados por Urxencias Sanitarias foron 114. O helicóptero medicalizado tivo que desprazarse en tres ocasións, mentres que as ambulancias asistenciais atenderon 87 dos incidentes que en 100 casos derivaron en traslados a centros sanitarios.