​Os deputados de En Marea lembran no Congreso que "o pobo é quen máis ordena"

Os deputados de Unidos Podemos e os seus socios das confluencias volveron aproveitar o acatamento da Constitución ao tomar posesión dos seus escanos no Congreso para lanzar mensaxes e, en concreto, os de En Marea proclamaron que "o pobo é quen máis ordena", á vez que reivindicaron o galego, ao empregar esta lingua nas súas mensaxes tanto na Cámara baixa como na alta.

"O pobo é quen manda", defendeu en galego a portavoz de En Marea, Alexandra Fernández, de Anova. Nesa mesma liña, o seu compañeiro en Anova Miguel Anxo Fernán Vello e Yolanda Díaz, de Esquerda Unida, tamén introduciron na súa breve alocución a proclama "o pobo é quen máis ordena" (o verso máis famoso da canción convertida en símbolo da Revolución dos Cravos de Portugal).

No caso de Alexandra Fernández tamén agregou que promete a Carta Magna "sen renunciar aos principios republicanos", mentres que Díaz, tamén proclamou que seguirá "loitando polo que resulta moralmente xusto e defendendo á xente" e Fernán Vello prometeu o seu escano "como cidadán galego, pola defensa das clases populares".

Pola súa banda, Antón Gómez-Reino, de Podemos, prometeu o seu escano "polas institucións ao servizo da cidadanía e do pobo galego", mentres que a súa compañeira de partido, Ángela Rodríguez, comprometeuse a acatar a Constitución "e traballar para mellorala", unha mensaxe similar ao lanzado polo líder do partido morado, Pablo Iglesias, puño no alto. "Por un país sen medo nin violencias machistas", agregou a deputada por Pontevedra.

Finalmente, no Senado, Vanessa Angustia tamén empregou o galego para reivindicar que prometía a Carta Magna "sen renunciar" aos seus "principios republicanos". A senadora comprometeuse a poñer as institucións ao servizo da clase traballadora". "Non pasarán", concluíu.

BALBORDO NA CÁMARA

Os xestos simbólicos dos deputados de Podemos e as súas confluencias volveron provocar o balbordo na Cámara, xa que algúns deputados doutros grupos reaccionaron, do mesmo xeito que en xaneiro, con murmurios, apupos ou indignación, o que levou a que apenas se entendesen algunhas das reivindicacións.

O alboroto levou á nova presidenta do Congreso, Ana Pastor, a chamar á orde aos deputados por primeira vez, só minutos despois de asumir o seu cargo. "Garden silencio", reclamou ao parlamentarios Pastor, que se viu obrigada a intervir despois noutras dúas ocasións para pedir calma.

Un dos momentos de maior tensión produciuse cando lle tocou prometer a Constitución á xefa de gabinete de Iglesias, a dirixente Irene Montero. "Prometo acatar esta Constitución e traballar para cambiala. Prometo non esquecer quen somos, de que lado estamos e quen traizoou o noso pobo. Nunca máis un país sen os seus pobos e as súas xentes", asegurou Montero, mentres o seu compañeiro de grupo, Manolo Monereo, aínda protestaba a berros polos murmurios da bancada 'popular'.

Os de Unidos Podemos e as confluencias non foron os únicos parlamentarios que quixeron deixar o seu selo neste trámite parlamentario. Así, os deputados de ERC e de EH Bildu tamén trasladaron diferentes mensaxes. "Por imperativo legal e pola proclamación da República Catalá", defenderon cada un dos republicanos cataláns.