Na Coruña botan en falta a Ferreiro

A portavoz do Grupo Municipal do PP no Concello da Coruña, Rosa Gallego, cualificou o rexedor coruñés, Xulio Ferreiro, como un alcalde "por horas", á vez que lle reprochou falta de "dedicación e de xestión".

En rolda de prensa, argumentou que a visión "curtopracista" do alcalde esta deixando acidade inmersa "nun círculo vicioso". "Porque non xestiona, perde emprego --dixo sobre os datos do paro-- non paga a provedores, non atende os barrios e non executa o orzamento".

Por outra banda, atribuíu ao PP a obtención de 11,5 millóns para 14 'proxectos Smart', mentres que argumentou que a Marea conseguiu "dous millóns a repartir entre catro cidades e un só proxecto, mentres Murcia logra 8 millóns, Las Palmas 8 millóns, Santander 7 millóns, Lugo 4,1 millóns e Ponferrada 1,6 millóns".

"Con Ferreiro, A Coruña pasou de ser a locomotora económica do noroeste peninsular e de España en Smart City a furgón de cola". "Non hai ambición, e o que é peor, non hai dedicación por parte dun Ferreiro que é un alcalde por horas nos seus intres libres entre reunión e reunión electoral", sentenciou.