​“Ourense con Leiceaga”, nova campaña de apoio ao candidato do PSdeG

O PSOE da cidade de Ourense vén de lanzar unha campaña de apoio ao candidato á Presidencia da Xunta, Xoaquín Fernández Leiceaga. “Ourense con Leiceaga” é o lema da campaña que encabezará a secretaria xeral e número tres por Ourense Carmen Rodríguez Dacosta, quen destaca a “importancia dos comicios para poner fin ás políticas do PP e o seu desprezo pola cidade”.

POLÉMICA POLO “CAMBIAZO”

A campaña de apoio sucede a unha longa lista de desavenencias no seo do PSdeG tras os retoques de Ferraz ás listas. A secretaria da organización, María Quintas, relegada ao número 5 na lista, mostrábase dura co candidato socialista ao afirmar que se sentían “estafados e defraudados” polos cambios, que consideraban “non son obxectivos”.

Tamén o secretario xeral provincial do PSOE en Ourense, Raúl Fernández, presentara un recurso ante os órganos federais do seu partido para pedir a anulación da candidatura da súa provincia ás eleccións galegas do próximo 25 de setembro.