​O alcalde de Chantada, convencido de que o incendio que afecta a Rede Natura foi intencionado

O alcalde de Chantada, Manuel Varela, mostrouse convencido de que o lume que se orixinou ao redor das tres da tarde deste domingo na parroquia de Requeixo foi intencionado.

O incendio forestal quedou controlado esta mañá tras arrasar ao redor de 100 hectáreas de Rede Natura. Nos traballos de extinción traballaron un técnico, catro axentes, 29 brigadas, 11 motobombas, tres pas, 13 helicópteros e tres avións.

Segundo o rexedor, "isto non foi fortuíto" porque para acceder á zona na que se orixinaron as chamas "só se pode ir a pé, non ten fácil acceso".

Das ao redor de 100 hectáreas queimadas, unhas 80 correspóndense con monte raso e ao redor de 20 a plantacións que financiou a Xunta de Galicia fai cinco anos, segundo os datos do primeiro edil.

"Eu só teño que preguntar se tanto nos custa aos contribuíntes darnos conta do que nos custan estas "fechorías"; ao que prende lume deberían arderlle as mans, por non dicir outra cousa", censurou.