​Falece un traballador tras envorcar o tractor que conducía en Maceda

Un traballador faleceu este venres no municipio ourensán de Maceda tras sufrir un accidente co tractor con maquinaria que manexaba mentres rozaba unha zona de monte.

Segundo informou o 112 Galicia, o falecido manexaba un tractor con maquinaria que envorcou e quedou atrapado no interior. O home traballaba nunha zona de difícil acceso entre Pías e o Monte de Castro de Escuadro, no lugar da Teixeira, en Maceda.

Un compañeiro chamou ao 112 Galicia sobre as 9,00 horas para avisar do sucedido tras o que se puxo en marcha un operativo no que participou o servizo de Protección Civil da localidade, os axentes da Garda Civil e profesionais de Urxencias Sanitarias.

Así mesmo, foron informados os voluntarios de Protección Civil de Baños de Molgas e os Bombeiros de Ourense.

ELEVADA SINIESTRALIDADE 

Este accidente súmase aos acontecido durante este verán, e activa a alerta de novo sobre a elevada siniestralidade con esta maquinaria. Tres de cada dez sinistros mortais con esta maquinaria prodúcense en estradas galegas, xeralmente ao envorcar o tractor, e máis da metade destes vehículos agrarios galegos supera os 20 anos.