PERFIL | ​Ana Pontón, a candidata feminista que ten o reto de reter o electorado

|

Anapontondebate


"Nova, pero sobradamente preparada". Así ven os seus a Ana Pontón (Sarria-Lugo, 1977), a candidata do BNG á Presidencia da Xunta. Non en balde, o seu traballo político comezou coas primeiras horas de universidade na compostelá Facultade de Ciencias Políticas, aínda que a súa inquietude naceu cando aínda non tiña a maioría de idade na súa terra natal e vinculada a Galiza Nova. E desde 2001, estivo na primeira liña da fronte nacionalista.


É militante da Unión do Povo Galego (UPG), o partido político que historicamente fixo valer os seus posicionamentos no seo do BNG. De feito, un dos históricos dirixentes da 'Ou', Francisco Rodríguez, sempre tivo "unha moi boa valoración de Ana, que sempre destacou polo seu potencial", asegura un dos seus compañeiros de fatigas e militancia con quen se iniciou, Rubén Cela.


Realmente onde fixeron faragullas foi en Cuba, no Festival Mundial da Mocidade de 1997, xunto a unha xeración na que tamén se atopa o que foi presidente da Mesa pola Normalización Lingüística e candidato nas pasadas xerais, Carlos Callón.


A cabeza de cartel do BNG é tamén a portavoz nacional, cargo que asumiu en febreiro deste ano 16, nas horas máis baixas da formación frontista, ferida polas escisións que colearon desde 2012 e que tiveron o último capítulo despois desa asemblea. Con todo, outras figuras que estaban en desacordo coa liña actual, como Tereixa Paz e Carme Adán ou o exportavoz nacional Xavier Vence quedáronse no Bloque e, no caso das dúas primeiras, mesmo, tiveron presenza nesta campaña.


É, ademais, a primeira muller que colle as rendas dunha formación que, nestas eleccións, ten o reto de resistir, para, despois, renacer nunha refundación tamén acordada pola asemblea nacionalista de principios deste ano, proceso que agora fixo unha paréntese para centrarse na carreira cara ás urnas.


"Un tempo novo" é o lema electoral do Bloque que, da man de Ana Pontón, quere pedir unha segunda oportunidade ao que foi o seu electorado e que, de feito, reflicte a dobre misión que foi posta en mans da dirixente nacionalista.


Para manter ao Bloque, Ana Pontón buscou facerse co electorado nacionalista que se desprazou á opción exposta por En Marea, o partido que ten como un dos seus referentes polo histórico Xosé Manuel Beiras, quen abandonou o BNG en 2012 para buscar unha fronte de esquerdas despois de 30 anos de militancia na organización que contribuíu a fundar.


Pontón é sarriá de nacemento, pero a súa vida está moi vinculada a Compostela, cidade na que coincidiu cando era (máis) moza cun dos seus principais rivais, o maxistrado en excedencia de Lugo Luís Villares, con quen compartía militancia no movemento estudantil dos Comités Abertos da Facultade (CAF). A el e ao candidato do PSOE, Xoaquín Fernández Leiceaga, será a primeira en chamalos para formar un goberno alternativo a Feijóo se o actual presidente da Xunta perde a maioría absoluta.


Ao seu pobo natal, Ana Pontón acudiu nesta carreira cara ás urnas e sorprendeu a todos cos seus dotes de panadeira no establecemento de toda a vida e mesmo chamou a atención o seu cálculo mental, a pesar de ser de 'letras'. E é que, nesta campaña de miles de quilómetros percorridos, Pontón púxose, entre outras, a bata de autónoma e de produtora láctea.


Defínea o seu "espírito de superación". De feito, ela mesma confesa que non ten vocacións frustradas porque aínda queda moito camiño por diante. Unha persoa con "rigor", con "capacidade de escoitar", que fai "autocrítica" e moi positiva" son algunhas das características que lle atribúe a súa contorna, aínda que ela diría: "Os seres humanos temos moitos defectos e, de cando en vez, virtudes".


A SÚA EXPERIENCIA PARLAMENTARIA


Ana Pontón tivo éxito no debate electoral celebrado entre os cinco principais candidatos pola CRTVG e, á marxe das peticións de 'selfies' que se multiplicaron ao converterse nun rostro coñecido, recibiu boas críticas desde distintos ámbitos.


Aínda que é a primeira vez que compite pola Xunta, a sarriá e compostelá de adopción ten experiencia na esgrima parlamentaria e, ao contrario que os seus opoñentes políticos (Leiceaga era portavoz pero a sesión de control exercíaa o presidente do grupo no Parlamento), xa se bateu con Alberto Núñez Feijóo na Cámara galega.


Unha desas ocasións foi o Debate sobre o Estado da Autonomía do ano 2012, cando asumiu a Portavocía do BNG na Cámara tras a renuncia de Carlos Aymerich, que abandonou o cargo (un ano máis tarde deixaría o Parlamento), despois do primeiro intento que levou entón xunto a Máis Galiza de arrebatar o poder á plataforma interna impulsada pola UPG nunha asemblea do Bloque.


Apenas un mes despois daquilo, unha moza Ana Pontón preparaba polos xardíns do Pazo do Hórreo cunha das súas asesoras a intervención que pronunciaría na súa fiscalización a Feijóo, que meses despois renovaría a súa segunda maioría absoluta coa oposición máis dividida pola escisións do BNG e a irrupción de AGE.


"Honestamente, creo que cada día que pasa son máis os galegos que asinaron a súa liquidación e están a pensar en despedilo sen indemnización. A causa é obxectiva: É vostede o peor presidente da historia de Galicia", espetoulle aquel 13 de marzo Ana Pontón a Feijóo. Aínda que non acertou no seu prognóstico, a moza dirixente non se baixou da súa contundencia no discurso, e "solvencia" --como afirma a súa contorna--, en diante.


Entón aínda non se coñecían publicamente as fotos de Feijóo co daquela contrabandista e logo condenado por narcotráfico Marcial Dorado, que publicou o xornal 'O País'. As imaxes non saíran aínda á luz en 2012 e o seu impacto aínda non se mediu nunhas eleccións autonómicas, aínda que a oposición púxoas o foco dos seus reproches esta lexislatura. Pontón sacounas no seu primeiro minuto do debate electoral televisado.


Tampouco saltaran entón os grandes casos de corrupción política. Ana Pontón que, naquel debut no debate sobre a situación de Galicia comparou ao presidente autonómico co protagonista do libro de Óscar Wilde 'O retrato de Dorian Gray', non dubidou agora en sentenciar: "Baltar (imputado por supostamente ofrecer traballo a cambio de sexo) é a Rita Barberá de Feijóo".


'Pandereita', aínda que xa non exerce por falta de tempo, Ana Pontón sempre dixo que no BNG pódese "discutir de todo", menos que é "nacionalista", e comprometeuse cunha papeleta que así o reflectise nas eleccións galegas por encima de calquera acordo con En Marea, por estar apoiada por forzas estatais. Este domingo pon a proba a súa promesa.



relacionada Ana Pontón: "Somos o pobo de 'Nunca Máis', xente loitadora"
relacionada ​Villares y Pontón condenan que Feijóo mida la corrupción en número de votos
relacionada ​Ana Pontón: "Queremos ter a chave do noso diñeiro, non Montoro"

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial
Powered by Bigpress