​Un incendio obriga a desaloxar a mítica discoteca Apolo, en Santiago de Compostela

Os efectivos de emerxencias tiveron que desaloxar na madrugada deste xoves unha céntrica discoteca de Santiago de Compostela despois de que se declarase un incendio no recinto. Trátase da mítica discoteca Apolo, segundo informa o xornal El Correo Gallego, un lugar moi frecuentado polos estudantes composteláns. 

Segundo a información da Central de Atención a Emerxencias 112-Galicia, o lume comezou sobre as 5,00 horas da madrugada na cabina do DJ.

Ata a zona desprazáronse os Bombeiros de Santiago e efectivos de Policía Local e de Garda Civil, que desaloxaron o establecemento. Por precaución, foi alertado o 061, aínda que ninguén sufriu danos.

Segundo os Bombeiros, todo apunta a que o lume se iniciou no motor dun sistema de ventilación e puido ser atallado sen lamentar danos persoais.

Por outra banda, os Bombeiros de Santiago interviñeron sobre as 6,45 horas desta madrugada na extinción dun lume iniciado nun vehículo na parroquia de San Xoán de Data, en Lamascal.

Neste operativo participaron tamén Protección Civil, Policía Nacional, Policía Local e Garda Civil. Os axentes investigan agora a orixe do lume, que podería ser intencionado.