​A USC e a Deputación da Coruña acordan o financiamento de actividades conxuntas

O reitor da Universidade de Santiago, Juan Viaño, e a vicepresidenta e deputada de Cultura e Normalización Lingüística da Deputación da Coruña, Goretti Sanmartín, asinaron este mércores o acordo de colaboración para financiar actividades para desenvolver este ano.

Segundo informou a USC, a sinatura formalizada este mércores en San Xerome, en Santiago, refírese a un acordo de colaboración centrado na programación para fomento da educación, a investigación, a transferencia do coñecemento e actividades culturais, artísticas e científicas.

O acordo establece catro liñas de acción prioritarias; tales como apoio aos programas de detección e captación de talento e olimpíadas e concursos académicos; á programación cultural; á deportiva; e a congresos, seminarios e cursos.

LEMAS CONTRA A VIOLENCIA MACHISTA

O 16 de novembro remata o prazo para a presentación de frases para o III Concurso de Lemas contra a Violencia de Xénero, dirixido a alumnos da USC, que premiará mensaxes que se poidan sumar á campaña de sensibilización. Deben ser en galego, orixinais e inéditas. Entre elas, elixirán un máximo de seis gañadores, tres por cada campus, que recibirán un premio en metálico de 100 euros e un diploma acreditativo.

PLAN DE EMPREGO

Doutra banda, a Deputación da Coruña promoveu a contratación dun total de 519 persoas nos 82 concellos coruñeses de menos de 20.000 habitantes da provincia, no marco do seu Plan de Emprego Local (PEL) 2016-2019, segundo os datos facilitados polo presidente provincial, Valentín González Formoso.

Nos seus primeiros meses de actividade, e a través da liña de apoio ás contratacións nos concellos, este plan supuxo pasar das 218 contratacións en 2015 ás 519 actuais. "O emprego é unha obsesión do goberno provincial", subliñou o presidente da institución coruñesa.

Xunto a esta actuación, Formoso destacou que o Plan de Emprego Local establece tamén medidas para apoiar iniciativas como os viveiros de empresas ou promover xornadas formativas como a celebrada este mércores no Pazo de Mariñán, en Bergondo (A Coruña) coa presenza de medio cento de emprendedores.