​Detido en Ourense o autor de 29 roubos

A Policía Nacional detivo en Ourense un home acusado de 29 roubos con forza no interior de vehículos cometidos entre o 6 e o 9 de outubro nas rúas do Barrio do Couto e As Lagoas e entre o 20 e o 23 de outubro nos barrios Vinte e un e Milagrosa.

Segundo informou o corpo, a detención estivo motivada polo incremento dos roubos con forza no interior de vehículos aparcados na vía pública nestas zonas da cidade.

Por mor da investigación, os axentes determinaron que o lugar de comisión dos feitos, o 'modus operandi', a coincidencia nos modelos dos vehículos e os efectos subtraídos apuntaban cara a dous irmáns coñecidos do ámbito policial por este tipo de feitos delituosos.

Así, procedeuse á detención dun deles e á comunicación á Fiscalía de Menores de Ourense do outro, debido a que é menor de idade e atópase cumprindo unha medida cautelar.

O detido é un home de dezanove anos de idade, natural de Ourense, ao que lle constan dúas detencións anteriores.