​A CIG denuncia que se seguen a vender "produtos tóxicos" coma as preferentes

A CIG alerta de que as entidades bancarias seguen a colocar aos seus clientes "produtos tóxicos", unha situación que lembra a experiencia recente da "mala praxe comercial de preferentes, cláusulas chan, waps, valores...". Así o manifestou o secretario nacional da CIG-Banca, Clodomiro Montero, nunha reunión con representantes do BNG.

O sindicalista sostén que a Comisión Nacional do Mercado de Valores debe ser máis estrita á hora de valorar os produtos financeiros e reiterou que son os traballadores e traballadoras da banca os que están obrigados a colocalos entre os aforradores. Estamos pois, "ante unha nova tormenta perfecta" como sucedeu coas preferentes, concluíu.

Tamén comunicou que a campaña da CIG-Banca que reclama protección dos consumidores será trasladada, ademáis da Cámara galega, ao Congreso e aoParlamento Europeo.

"SEGUNDA ESTAFA DAS PREFERENTES"

Do BNG asistiron á reunión a portavoz parlamentaria do BNG, Ana Pontón, xunto as deputadas, Montse Prado e Noa Presas. A portavoz nacionalista advertiu que "podemos estar ante unha segunda estafa das preferentes e outros produtos financeiros prexudiciais para os consumidores e consumidoras". Dende o BNG, dixo, "temos un compromiso para que se tomen todas as medidas necesarias de protección" porque, a pesar da normativa comunitaria "existe unha grande indefensión" dos clientes de entidades bancarias.

Ademáis, criticou que a Xunta e o Goberno central "miran para outro lado" e anunciou que o BNG reclamará "unha regulación máis estrita" dos produtos financeiros que se venden a minoristas, xunto con "oficinas especializadas de atención aos clientes da banca" para actuar preventivamente ou protexelos ante abusos.