​Evacuados tres edificios debido a un escape de gas en Vilagarcía de Arousa

Tres edificios situados na rúa Rosalía de Castro do municipio de Vilagarcía de Arousa (Pontevedra) foron desaloxados na tarde do mércores polos servizos de emerxencias debido a un escape de gas.

Segundo informou o 112 Galicia, a perforación accidental dunha tubaxe provocou un escape de gas que obrigou a evacuar varias vivendas, pero ninguén resultou afectado. Así, en canto baixaron os niveis de concentración de gas, os veciños puideron volver ás súas casas.

Un operario que participaba nunhas obras que están a facer na rúa chamou ao 112 Galicia cando estaban a piques de dar as 18,30 horas do mércores e explicou que, fortuitamente, picaran unha tubaxe de gas natural e estábase producindo unha fuga.

Por iso, o CAE 112 Galicia pediu a colaboración dos Bombeiros do Salnés, do servizo de emerxencias municipal e dos axentes da Policía Local. Igualmente, foron informados os técnicos da empresa subministradora do servizo.

Unha vez no lugar, os bombeiros comprobaron que había unha alta concentración de gas e decidiron desaloxar as vivendas próximas. Ademais, cortaron a subministración mentres os técnicos da empresa reparan a avaría. Sobre as 22,00 horas os veciños volveron ás súas casas.