​Un home resulta ferido ao caer do tellado en Arzúa

Un home resultou ferido este martes en Arzúa (A Coruña) ao caer do tellado da súa casa e precipitarse ao chan desde unha altura duns catro metros, segundo informa o 112.

Os feitos tiveron lugar en Retorno, na parroquia de Branzá. Un particular solicitou axuda ao 112 ás 13,30 horas e, segundo o seu relato, a vítima estaba inconsciente.

O 112 explicou a situación a Urxencias Médicas e os efectivos sanitarios mobilizaron unha ambulancia e un helicóptero medicalizado. Tamén foron informados Protección Civil e a Garda Civil.

FERIDO EN RIBADAVIA

Unha persoa resultou ferida este martes en Ribadavia (Ourense) ao sufrir un accidente co seu 'chimpín'. A vítima quedou atrapada debaixo da máquina agrícola e foi rescatada por varios particulares.

Segundo informa o 112, os feitos aconteceron este martes nun camiño próximo ao río Miño, na parroquia de Francelos.

O 112 foi avisado do accidente ás 17,00 horas a través da alerta de Urxencias Médicas e alertou ao GES de Ribadavia, a Protección Civil e á Garda Civil.