​Santiago de Compostela, entre os mellores destinos para viaxar en 2017

A cidade de Santiago de Compostela foi elixida entre os oito destinos españois máis recomendables para viaxar en 2017, segundo o ránking elaborado polo buscador de hoteis trivago.es, que ponderou tanto a reputación 'online' da planta hostaleira como os prezos medios máis económicos.

O ránking 'Best Value City Index' sobre os destinos do mundo máis recomendables para viaxar o próximo ano divídese en seis listas que reúnen destinos de Europa, Norte e Centro América, América do Sur, África, Asia e Oceanía.

No ránking europeo aparecen oito destinos españois (Cangas de Onís, Santillana del Mar, Cuenca, León, Santiago de Compostela, Ronda, Nerja e Oviedo) e reúne desde populares cidades como San Petersburgo, ata lugares con historia como Viterbo (Italia) ou enclaves declarados Patrimonio da Humanidade como Sintra, en Portugal.

En primeira posición atópase Mostar (Bosnia e Herzegovina), seguida de Novi Sad (Serbia) e Veliko Tarnovo (Bulgaria). As tres localidades son as que mellor reputación online reúne a súa planta hostaleira (97,59; 97,54; 97,53). Aloxarse unha noite nestas cidades custa unha media de 43 euros, 41 euros e 36 euros por noite en habitación dobre.

En xeral, son os destinos de Europa do Leste os que ofrecen unha mellor relación calidade-prezo nos seus aloxamentos, tanto en grandes como de pequenas cidades. Nas primeiras posicións tamén conseguen facerse uns oco destinos de Italia e Portugal, como Trapani e Fátima; de Centro Europa, como Lódz; así como moitos rusos.

Os destinos españois, a pesar de ter moi boa valoración, atópanse na segunda metade da táboa por presentar prezos algo máis elevados que o resto.