Enfermeiros especialistas denuncian o bloqueo da súa inserción laboral
Os especialistas en enfermaría familiar e comunitaria entregaron dúas cartas na Consellaría de Sanidade dirixidas ao Conselleiro e a RRHH.
O grupo de Promoción da Especialidade da Asociación Galega de Enfermaría Familiar e Comunitaria (AGEFEC) vén de facer entrega, na sede central do Sergas, de dúas cartas dirixidas ao Conselleiro de Sanidade, Jesús Vázquez Almunia, e á Directora Xeral de Recursos Humanos co fin de denunciar a "discriminación" que sofre o colectivo fronte ás especialidades de enfermeiras de ámbito hospitalario, posto que segundo a AGEFEC, a especialidade Familiar e Comunitaria non está recoñecida nin para Atención Primaria ni para Saúde Pública.
Segundo o colectivo, esta "discriminación" denota a "falta de consideración e aposta pola Atención Primaria por parte da Consellaría e do SERGAS", ademais dun "desprezo" ao colectivo posto que non están a ter en conta o diñeiro público investido nestes profesionais, así coma o "esforzo humano" de titores e colaboradores docentes que os forman "sen ningún tipo de remuneración a maiores, simplemente por compromiso coa sanidade pública".
Os especialistas denuncian ademais que se utilice a burocracia para "ralentizar e complicar un proceso que está pendente unicamente de que o SERGAS informe ás organizacións sindicais da Mesa Sectorial de Sanidade e acto seguido proceda a publicar unha orde de apertura de listas de contratación".
O colectivo de especialistas advirte que non van consentir "ser un dano colateral de ningún tipo de negociación cos sindicatos ou outros colectivos", e instan ao Conselleiro de Sanidade a "reaccionar" e "desbloquear" a situación que padecen.
Escribe tu comentario