Senra destaca a importancia de levar a voz dos galegos a Europa

A eurodeputada de AGEe, Lídia Senra, destacou a "importancia" de que os asuntos que se debaten no Parlamento Europeo estean "na axenda" de Galicia dado que "máis do 80% das decisións que se toman a nivel institucional" e que afectan "ao día a día dos galegos" veñen das institucións europeas.

A europarlamentaria pronunciouse deste xeito durante un encontro con veciños en Becerrerá (Lugo), aos que explicou o seu traballo en Bruxelas e a relevancia de "ter presenza" alí para "dar as batallas" sobre cuestións que "se aplicarán nun futuro próximo" en Galicia.

"Paréceme moi importante que os asuntos que se debaten a nivel europeo se teñan aquí tamén en axenda e que os coñezamos para que teñamos a capacidade de reaccionar e manifestarnos cando sexan políticas que nos van a prexudicar", sinalou.

Neste sentido, puxo como exemplo de medidas que "afectarán moi negativamente" ás áreas de montaña galegas o tratado de libre comercio entre a Unión Europea e Canadá, que "abre os mercados á importación de carne de vacún" canadense.

"Nun contexto no que nós temos a cota de mercado cuberta, abrir as importacións á carne de Canadá repercutirá negativamente nos produtores de vacún de toda a Unión Europea", indicou.

Por iso, incidiu na importancia de "ocupar espazos en Europa" para "levar a voz" de Galicia e "defender que outras políticas son posibles".