Galego
A CORUÑA
O PP pasa a ser a lista máis votada na Coruña por 28 votos pero gobernarán as mareas co apoio do PSOE
O PP converteuse na lista máis votada na Coruña tras aceptarse parte das súas impugnacións ante a Xunta Electoral. En concreto, segundo informa o Tribunal Superior de Xustiza de Galicia (TSXG), o PP obtivo 36.885 votos fronte aos 36.857 da Marea Atlántica.
Ante a Xunta Electoral, os populares impugnaran un total de 56 votos declarados nulos. Tras aceptarse parte destas impugnacións, convértese na lista máis votada o que, con todo, non implicará ningún cambio de face á gobernabilidade.
De feito, desde a Marea Atlántica, fontes consultadas por Europa Press incidiron neste feito. "Os cidadáns votaron o cambio", remarcaron sobre o resultado electoral que lles outorgou 10 concelleiros, os mesmos que os do PP.
O PSOE ANUNCIOU QUE APOIARÁ "O CAMBIO"
Polo momento, a plataforma cidadá non iniciou os contactos coas outras formacións de face á investidura, aínda que desde o PSOE xa anunciaron que apoiarán o "cambio" no goberno.
Até coñecerse a decisión da Xunta Electoral, unha vez efectuado o reconto duns 6.000 votos, a Marea Atlántica mantíñase como a formación máis votada, por catro votos.
RECURSO ANTE A XUNTA ELECTORAL CENTRAL
Segundo informaron fontes do TSXG, aínda queda como posibilidade de recurso acudir á Xunta Electoral Central.
Despois, habería que acudir á Sección Primeira do Contencioso Administrativo do alto tribunal galego.
Escribe tu comentario