A Secretaría Xeral para o Deporte e a Dirección Xeral de Emerxencias e Interior reúnense co sector deportivo do automobilismo galego

O secretario xeral para o Deporte, José Ramón Lete, e a subdirectora xeral de Xogo e Espectáculos Públicos da Dirección Xeral de Emerxencias e Interior, Guillermina Núñez, mantiveron hoxe unha reunión con representantes da Federación Galega de Automobilismo e as principais escuderías galegas para abrir un proceso de estudo e análise sobre futuras actuacións. O obxectivo é reforzar a máxima garantía na organización das competicións automobilísticas en Galicia.

Partindo dun recoñecemento xeral aos actuais estándares de calidade na organización destas probas en Galicia, equiparables aos do resto do Estado, no curso da reunión o tecido deportivo do automobilismo apuntou a necesidade de seguir traballando dende distintas áreas de actuación cara optimizar os estándares de calidade existentes.

Abordáronse así aspectos como os da información e concienciación do público ou a adopción de novos requirimentos técnicos e organizativos das probas que complementen aos actuais, e todo iso co fin de minimizar ao máximo os perigos dun deporte que, como este, é de risco.

A Federación comprometeuse a constituír un grupo de traballo que veña a traballar nestas novas medidas e accións, e que serán de aplicación á toda a actividade federativa.