O Centro de Innovación Aeroespacial de Galicia despega co a unión público-privada
O conselleiro de Economía, Emprego e Industria resalta que a nova iniciativa “se configura como unha oportunidade de diversificación para a industria e o talento galegos”
Conde resaltou o lazo estreito entre os sectores aeroespacial e aeronáutico, e neste senso destacou que a nova entidade será un complemento para o Centro de Investigación Aerotransportada de Rozas,
A Fundación Centro de Innovación Aeroespacial de Galicia xa é unha realidade.
Antonio Rodríguez, Salustiano Mato, Teresa Pedrosa, Francisco Conde e Enrique Mallón
Os representantes dos patróns fundadores de carácter público, Universidade de Vigo e Zona Franca, e os privados, Airbus, Consorcio Aeronaútico Gallego (CAG), Deltavigo e a Unión de Empresas Gallegas de Aeronáutica (Udega), asinaron hoxe ante notario a constitución dun centro chamado a convertese no principal foco de innovación e desenvolvemento do noroeste peninsular para o sector aeroespacial.
“O que pretendemos é achegar as capacidades dos nosos científicos e tecnólogos para responder á demanda do sector, de todos os patróns empresariais, que son os que gobernan este centro e o que se fai nel e por tanto definir as liñas de investigación, cara onde debemos ir e os servizos e prestacións que o centro debe de desenvolver para que eles podan ser atendidos para ser máis competitivos e crecer como sector”, explicou o reitor da Universidade de Vigo, Salustiano Mato, que confirmou a participación de 500 investigadores e investigadoras da institución académica, integrados en grupos que compoñen a agrupación estratéxica de industria e enerxía, así como do Centro de investigación en Tecnoloxías da Información e Comunicacións, AtlantTIC.
O Centro conta cun capital social inicial total de 100.000 euros, achegado nun 52% polos patróns fundadores de carácter privado en un 48% polos patróns públicos. Trátase ademais, segundo explicou Salustiano Mato dun deseño de centro de innovación diferente cun modelo de negocio a risco cero. “É un protocentro tecnolóxico que busca traballar no que demanda a empresa e que neste intre non ten o noso ecosistema de innovación”, sinalou o reitor da Universidade de Vigo.
Unha industria que ten "pouco que dicir e moito que facer"
Pola súa banda, o presidente do Consorcio Aeronáutico Gallego, Enrique Mallón, lembrou os inicios deste ente no ano 2007, así como os fitos máis destacados da súa evolución e manifestou o seu compromiso de impulsar a innovación mediante a achega de ideas e a xestión privada para poñer a Galicia no mapa aeronáutico e aeroespacial. “Tomamos este proxecto moi, moi en serio”, asegurou o presidente do Consorcio, para que a presenza de Airbus constitúe unha imporante motivación.
Coa Universidade e Zona Franca como membros fundadores, a esta iniciativa uníronse as principais empresas deste tipo radicadas en Galicia, destacando pola súa facturación Coasa e Delta Vigo, que xa dispoñen dos seus propios departamentos de I+D, máis centrados en cuestións de desenvolvemento e non tanto de investigación, así como outras empresas máis pequenas que se agruparon en Udega, e inclúen firmas como Hispamoldes, Tromosa, Tune Eureka ou Laser Galicia, todas elas con certificación aeroespacial UNE-EN 9100 de AENOR.
O ceo como unha oportunidade de futuro
“Hoxe asumimos un compromiso para camiñar cara a unha Galicia que mire ao ceo como unha oportunidade de ciencia, emprego e futuro”, dixo o conselleiro Francisco Conde, que se amosou convencido de que Galicia debe configurar un núcleo de innovación “coa vontade da Universidade de Vigo e a implicación do sector privado”. Conde incidiu na oportunidade de diversificación para a industria do país que constitúe este centro, que permitirá consolidar o sector aeronáutico xa existente, así como actuar de arrastre doutros sectores e servizos e completar a rede de centros tecnolóxicos e de innovación.
Na súa intervención o titular de Economía e Facenda da Xunta de Galicia destacou o papel protagonista da Universidade de Vigo nesta iniciativa, que asegurou ten os seus antecedentes sete anos atrás coa xestación, desenvolvemento e lanzamento do picosatélite XaTcobeo e que segue na actualidade coa participación, tamén da Agrupación Aeroespacial, no primeiro proxecto internacional para desviar un asteroide a súa órbita. “Investir en talento sempre dá resultado e niso ten experiencia a Universidade de Vigo”, asegurou Conde.
A posta en marcha do centro suporá tamén, a posibilidade de especializarse e dar servizo á hora de conseguir para o sector importantes proxectos con financiamento europeo dentro do programa Horizonte 2020 e o RIS3 galego.
Escribe tu comentario