O BNG recolle un informe do Consello de Europa como evidencia da "discriminación" do galego

O BNG recolleu un informe do Consello de Europa para denunciar a situación de "discriminación" na que se atopa a lingua galega. Consideran que o citado informe representa unha "enmenda  á totalidade á política do PP contra o galego", reclamando que se abra unha nova etapa. 

En concreto, a deputada Ana Pontón referíase ao cuarto informe do Comité de Expertos do Consello de Europa para a Carta Europea das Linguas Rexionais e Minoritarias, que considera que os límites que establece o decreto do plurilingüismo para o uso dos idiomas na ensinanza están "claramente en contradicción" cos compromisos escollidos polo Goberno ao adherirse ao acordo. 

Para Pontón, este informe supón unha "enmenda á totalidade á política do PP contra o galego", que desvela "moitas das mentiras que se veñen repetindo". 

Reclama que se poña punto e final ás políticas actuais, "recoñecendo a situación de desigualdade e desequilibrio" e elaborando "un novo decreto que regule a presenza do galego na ensinanza". 

Esta reclamación do BNG únese á doutras organizacións como a Real Academia Galega ou a CIG, que tamén fixeron súas as conclusións do Consello de Europa. 

En concreto, dende a RAG destacaran que  o informe "se fai eco" da chamada de atención da RAG sobre o impacto da redución do galego a un terzo do horario, a imposibilidade de impartir materias técnicas, como Matemáticas, nese idioma, ou a escasa presenza en infantil (nun 6,57 por cento en cidades de máis de 50.000 habitantes).

Ante este diagnóstico, a entidade insiste en que tanto a Xunta como o Goberno estatal "están moral e legalmente obrigados a tomar medidas positivas" cara á normalización do galego, un "obxectivo irrenunciable da sociedade".