​Dúas tortillas galegas, entre as preferidas do 'comidista'

(foto: tripadvisor)

No popular blog de alimentación 'El comidista', dirixido por Mikel López Iturriaga, non ocultan o seu amor pola tortilla de patata, un plato que mercería "ser declarado Patrimonio Inmaterial da humanidade".

Por iso acaban de publicar unha listaxe con 10 das mellores tortillas que do país, entre as que como non podía ser doutra forma destacan un par de bares galegos.

O primeiro deles é un clásico de Santiago. Situada no 46 da Rúa Nova. 'La Tita' leva anos sendo famosa pola súa tortilla pouco feita, que non ten desaparecido nin cos sucesivos cambios de propietarios. Xa sexa na versión reducida que sirven coa caña ou na máis grande que che ofrecen se pides unha ración, é unha opción moi a ter cando apreta a fame nas tardes de Compostela.

A outra opción destacada polo blog é a tortilla do Mesón 'O Pote', situado no número 9 da Travesía do Progreso de Betanzos. Neste caso, estamos ante a gañadora do Premio Nacional de 2011, cunha tortilla case líquida que cunha fama sobradamente merecida.

Por suposto, hai moitos outros bares en Galicia que poderían ser incluidos na lista. Os autores recoñecen que non recorreron cada aldea da xeografía española. Iso sí, aceptan suxerencias!