​As familias repiten o boicot na reválida de 3º de primaria

A "reválida" de 3º de primaria repetiu a alta porcentaxe de abstención que xa se rexistrara nas probas de 6º celebradas hai dúas semanas, superando o éxito do boicot que xa se convocara hai ano. 

A consellería de Educación recoñece nas súas cifras oficiais unha abstención do 40%, fronte ao 20% de alumnos que segundo a administración quedara na casa hai un ano. 

No caso dos colexios públicos, a Plataforma Galega en Defensa do Ensino Público, unha das convocantes do boicot, eleva a cifra de abstención ata o 82%, superando o 50% que segundo eles se conseguiu hai un ano e incluso repuntando levemente a que se acadou na proba de 6º.

Anxo Louzao, voceiro da plataforma, considera esta elevada insumisión como "unha chamada de atención rotunda" por parte das familias, que seguen negándose a que os seus fillos realicen unhas probas que "nada aportan ao sistema educativo" e pretenden "discriminar socialmente" ao alumnado máis desfavorecido. Destaca o feito de que en 3º de primaria os nenos non poden quedar na casa e que os pais ten que buscar alternativas, algo que para el proba a forza do rexeitamento cara as probas de evaluación.

Ademais, Fernando Varcárcel, presidente da Confederación de Anpas de Compostela, resaltou que o alto porcentaxe de familias que rexeita as probas "non pertence a unha ideoloxía, non son seguidores dunha única consigna". Asegura que o único que ten en común e o seu rexeitamento contra a Lomce, "unha lei que estorba, que discrimina, que clasifica". Considera que a consellería está "actuando contra a cidadanía", algo que non pode facer: "se o 80% das familias non queren reválidas non se deberían poder facer".