Unhas 700 persoas marchan na Coruña para concienciar sobre a parálise cerebral
Unha marcha solidaria reclamou cidades máis accesibles
Unhas 700 persoas rodaron este domingo na Coruña sobre patíns, bicicletas, patinetes, sillas de rodas... nunha marcha organizada pola Federación ASPACE Galicia para concienciar sobre a parálise cerebral.
Trátase da segunda edición dunha marcha que tivo como punto de partida a chaira da Torre de Hércules. Un grupo formado por 40 motoristas foi o encargado de abrila, seguidos por usuarios das entidades de ASPACE Galicia; membros de grupos deportivos, como os Galicia Rollers, Alquimia In Line e o club de patinaxe artística Brincadeira; membros de diversas entidades, como GRUMICO e ADCOR; ademais do resto de participantes que quixeron apoiar coa súa presenza este iniciativa "reivindicativa e integradora".
O percorrido, que transcorreu polo paseo marítimo, serviu para dar visibilidade ás capacidades do colectivo das persoas con parálise cerebral, así como para reivindicar a accesibilidade no ámbito urbano.
A marcha tivo o seu final na chaira do Estadio de Riazor, onde usuarios de ASPACE Coruña leron un pequeno manifesto no que se apostou por cidades "máis humanizadas onde todos teñan cabida"; ademais de reivindicar a necesidade de "apoiar e axudar" a este colectivo en diferentes ámbitos, como son "o emprego e a vivenda".
As intervencións do presidente de ASPACE Galicia, Eulogio López; o campión nacional e deportista paralímpico na modalidade de tenis en cadeira de rodas, Álvaro Illobre; e do presidente do CERMI Galicia, Anxo Queiruga, deron paso a un sorteo de agasallos co que se puxo punto final a esta xornada na que o colectivo con parálise cerebral foi o auténtico protagonista.
Escribe tu comentario