Detido un incendiario en Lousame

Axentes da Policía Autonómica, na orixe dun incendio. / Europa Press

A Policía Autonómica detivo un home como presunto autor de tres incendios forestais intencionados nos que arderon máis de 3.500 metros cadrados de monte no municipio de Lousame (A Coruña).

Os lumes rexistráronse o 4 de maio, o 29 de xuño e o 5 de xullo na parroquia de Fruime, nunha zona considerada como unha das de maior actividade incendiaria, segundo indicou Vicepresidencia e Consellería de Presidencia, Administracións Públicas e Xustiza nun comunicado.

Os tres incendios presentaron as mesmas características e modus operandi, tanto nas franxas horarias coma nos medios empregados para provocalos.

Nas tarefas de extinción dos mesmos contouse coa colaboración dos Servizos de Extinción de Incendios da Xunta, Distrito Forestal IV. Ademais, debido aos feitos, instruíronse dilixencias remitidas ao Xulgado de Primeira Instancia e Instrución en funcións de garda de Noia.

Na campaña actual contra incendios, a Policía Autonómica xa investigou a 31 persoas por delitos relacionados con incendios forestais.