​A rede internacional que roubaba vehículos de luxo tiña base en Galicia

A Garda Civil detivo a 31 persoas pertencentes a unha organización internacional con base en Galicia dedicada ao roubo de vehículos de luxo en varios países de Europa, ás que se lles imputan os delitos de pertenza a organización criminal, falsificación de documentos, branqueo de capitais e receptación.

Seis dos detidos residían na provincia de Pontevedra, concretamente en Vilanova de Arousa, Cambados, A Illa de Arousa e Pontevedra. Ademais, realizáronse rexistros en Paredes (Vilaboa), onde tiña residencia uno destes detidos, un home de orixe marroquí.

Xunto con estes seis detidos en Pontevedra, a rede quedou desarticulada coa captura doutras dúas persoas en España, unha en Barcelona e outra en Granada, tres en Bélxica, entre eles o líder da organización, e o groso do operativo, 20 persoas arrestadas, en Italia.

O coronel xefe da Garda Civil en Pontevedra, Miguel Estévez, detallou que se realizaron varios rexistros nos domicilios dos detidos intervindo unha considerable cantidade de diñeiro en efectivo, material informático, teléfonos móbiles, relevante documentación e outros efectos relacionados coa investigación.

MODUS OPERANDI

Froito destas investigacións, os axentes puideron determinar que os integrantes da organización elixían os vehículos que estaban na vía pública que querían roubar.

Posteriormente, conseguían a documentación falsificada do vehículo así como a do seu propietario. A continuación, con estes documentos presentábanse nos concesionarios oficiais das distintas marcas dos vehículos e obtiñan un duplicado das chaves de contacto.

Finalmente, unha vez tiñan na súa poder o duplicado das chaves, subtraían o vehículo e trasladábano a unha cidade con porto marítimo para exportalo ao continente africano.

Para levar a cabo todas estas actividades, a organización utilizaba distintas identidades falsas, constituían empresas ficticias, abrían numerosas contas bancarias e realizaban constantes cambios de domicilio para evadir a acción da xustiza e dificultar as investigacións policiais.