Falece Luis Caruncho, o pintor "da ciencia e a maxia"

Feria Internacional de Arte Contemporáneo Puro Arte, Vigo // Ricardo Grobas

O pintor e escultor galego Luis Caruncho faleceu este venres aos 87 anos na súa residencia de Madrid. Así o confirmou a Xunta de Galicia nun comunicado no que expresou o seu pésame polo falecemento "dun dos máis ilustres artistas galegos contemporáneos", figura que "recuperou a innovación e a vangarda en España a finais dos anos 50".

Fondamente influido pola súa condición de galego, tal e como indica no seu currículo na súa páxina web, "proxectou, sen dúbida, o universalismo da súa obra en todo momento, tal e como corresponde a esa orixe onde tantos nomes souberon compaxinar a conservación duns valores autóctonos e a dimensión do seu pensamento a todos os niveis".

Nacido na Coruña en 1929, Caruncho foi Medalla Castelao polo seu labor como pintor e escultor de proxección internacional e constitúe unha "referencia da arte galega contemporánea" pola súa pintura abstracta, na que se conxuga xeometría e sentido lúdico.

"A pintura de Luis Caruncho -escribiu Camilo José Cela- aliméntase de ciencia e maxia a partes iguais, ou sexa de tradición e un lume neno, devastador e recentemente estreado. A Giotto, cando adiviñou a perspectiva, non lle bailou a alma con maior esmero, nin con piruetas máis descomunais e perigosas", precisou o Nobel.

Como recoñecemento á súa traxectoria, foi membro de honra da Real Academia Galega de Belas Artes Nosa Señora do Rosario e recibiu a Medalla de Artes Plásticas de Madrid e o Premio Nacional de Cultura.

Luis Caruncho con Maruja Mallo e Luís Rosales // www.caruncho.eu

Este verán, a obra de Luís Caruncho foi protagonista dunha mostra colectiva na Casa da Parra de Santiago, impulsada pola Xunta. Unha década antes, en 2014, o Centro Galego de Arte Contemporánea (CGAC) dedicou unha exposición antolóxica á súa obra, que está representada en importantes coleccións de arte como a de Afundación, a do Palacio da Zarzuela, a do Centro de Arte Reina Sofía ou a do Museo da Fundación Pilar e Joan Miró.