Un mes de outubro repleto de mobilizacións contra a Lomce

|


Revalidas 4


O mes de outubro virá cargado de mobilizacións e iniciativas desde a comunidade escolar galega co obxectivo de visibilizar o rexeitamento ás probas finais de etapa, as chamadas 'reválidas', e para chamar á paralización do desenvolvemento da Lei Orgánica de Mellora da Calidade Educativa (Lomce) en Galicia.


A Plataforma Galega en Defensa do Ensino Público presentou este luns un calendario de accións "inmediatas" coas que, segundo destacou o secretario nacional da CIG-Ensino, Anxo Louzao, levarán á "batalla permanente" contra un modelo educativo construído "de costas" á sociedade.


Ademais dun manifesto, no que reprochan "a tiranía" de obrigar ao alumnado a "que se xogue o seu futuro académico co resultado dunha proba" construída desde un punto de vista "centralizador" e "elitista", levarán a cabo unha recollida de firmas e mocións a todos os concellos galegos.


ACTUACIÓNS


Os membros da Plataforma solicitarán reunións con todos os grupos parlamentarios que xurdiron tras as pasadas eleccións autonómicas, tan pronto estea constituída a nova Cámara galega.


Outras iniciativas pasarán pola celebración de charlas informativas e a colocación de pancartas e imaxes nos centros, nas redes sociais e nas páxinas web de Anpas e demais entidades co lema 'Nin reválidas nin Lomce'.


A acción máis rechamante celebrarase o próximo 13 de outubro, cando unha representación das entidades que constitúen a plataforma protagonizarán un acto de entrega de cabazas ante a Consellería de Educación para visibilizar "o inmenso suspenso" da xestión da administración autonómica.


Revalidaseuropapress

O 20 de outubro, pola súa banda, promoveranse pequenas concentracións en todos os centros durante o tempo de recreo na que profesorado e alumnado visibilizarán ese rexeitamento á 'Lei Wert' e ás probas finais, ademais de impulsar o hashtag #ninrevalidasninlomce a través das redes sociais.


Esta mesma xornada, o sindicato de alumnos 'Erguer' realizará un 'referendum' en contra da Lomce en diferentes centros da comunidade galega.


Preguntado pola folga xeral de estudantes convocada para o 26 de outubro, Louzao avanzou que, a pesar de tratarse de "campañas externas a Galicia", desde a plataforma pretenden poñer "toda a carne no asador" para que a xornada contra as 'reválidas' sexa "un éxito".


Neste sentido, matizou que están á espera de estudar, xunto a 'Erguer', unha forma de articular "ese día de loita" pero "pensado desde Galicia", para que responda a dinámicas da comunidade galega.


"VONTADE DA SOCIEDADE"


Louzao reprochou que se continúe o desenvolvemento dun modelo de probas do que se descoñece tanto "o contido, o deseño como as características", a pesar de que estas terán un valor académico "para a obtención do título" en próximos cursos e para o acceso á educación superior.


Tamén lembrou que o 80 por cento das familias rexeitou enviar aos seus fillos a clase durante a celebración das probas de 3º e 6º de Primaria, o que evidencia a "vontade" da sociedade para que se paralicen estes exames construídos segundo os principios "do sistema neoliberal".


"Estaremos aquí ata que desapareza", sinalou, nesta liña, Fernando Lacaci de Anpas Compostela, quen destacou que a porcentaxe de familias que está en contra das 'reválidas' "está moi por encima do apoio a calquera forza política" nos pasados comicios.

relacionada ​La reválida de Bachillerato será igual a la Selectividad
relacionada ​El Congreso reclama paralizar la LOMCE y retirar las reválidas
relacionada Centros escolares acollen un 'referendo simbólico" sobre a LOMCE

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress