Villares: "Hai que absterse do PP"

O portavoz de En Marea, Luís Villares, subliñou que "non hai que absterse fronte ao Partido Popular, senón que hai que absterse do Partido Popular", afirmación que lanzou dirixida ao PSOE e antes de chamar a atención sobre que un marco político alternativo, na súa opinión, "é posible".

Villares viu "inconcibible" que o Partido Socialista "teña dúbidas de absterse e permitir con esa abstención un goberno do PP". "En Marea segue dicindo o mesmo que dixo sempre: estamos na defensa do conxunto da cidadanía e cremos que é posible establecer un marco político alternativo que acabe coas políticas de recortes, de corrupción e de sufrimento do PP", aseverou.

Neste sentido, fixo un chamamento ás forzas políticas tanto no marco estatal, "para o establecemento de maiorías políticas alternativas" --puxo o exemplo de que "bastaba un acordo político entre as forzas que son maioritarias no Parlamento estatal para derrogar as reformas laborais"-- como a nivel galego.

Neste último ámbito, o da comunidade autónoma, apuntou que seguen "analizando o tema con prudencia", pero reiterou "un chamamento con serenidade pero con firmeza á responsabilidade do PSdeG". "O entorpecemento da acción política aos gobernos municipais das mareas é abrirlle as portas ao PP", dixo.

Nesta liña, chamou "a todo o mundo á responsabilidade" e a establecer liñas que permitan facer "políticas en clave de xustiza social nos concellos onde gobernan forzas que, como as mareas, abriron xa un novo tempo para os cidadáns deste país".

"TÁCTICA CASE GOLPISTA"

Neste contexto, Villares cualificou de "táctica case case golpista" o "cambio" coa xestora do PSOE "ao que foi unha liña que podía seguir" o anterior líder.

"O que fai é tentar invisibilizar que realmente existe alternativa política e, por tanto, é falaz dicir que só se pode concibir un goberno do PP en minoría", sentenciou.

"Existe a posibilidade de establecer maiorías políticas alternativas ás políticas de sufrimento do PP", incidiu. Por iso, apelou a "a xente que agora está a tomar as rendas do PSOE", para advertirlle de que "debe decidir se quere ser alternativa ou complemento". "Se se quere converter nos 'Cidadáns' do PP ou se queren exercer outra cousa", agregou.

En Marea, pola súa banda, ten "claro que é posible o establecemento de alianzas que paren as políticas de sufrimento do PP". "Agora, cada un terá que situarse", insistiu.

SÁNCHEZ AGUIÓN

Pola súa banda, Sánchez Aguión coincidiu en que "hai espazos e hai ámbitos" e expresou a súa desconformidade con que "non se explora esa posibilidade". "Por que estamos condenados a que o PP siga gobernando este país?", preguntouse.

O líder de CC.OO. en Galicia acusou ao PP de querer "utilizar o proceso electoral como unha lavadora e dicir que como xa o validaron os cidadáns, toda esa sede de Xénova que parece un estercolero, se limpa, elimínanse todos os problemas e lexitímase esta situación". "Nós cremos que hai e é necesario explorar outras alternativas", abundou.

MERCADO LABORAL

Villares e Sánchez Aguión reuníronse e constataron, en declaracións aos medios ao termo do encontro, a "sintonía" na análise da situación do mercado laboral e tamén en propostas para cambiala.

O portavoz de En Marea opinou que o "modelo alternativo social ten que ter unha translación concreta no marco das relacións laborais", e deu por feito que "non pode haber condicións de vida dignas e realización de dereitos sen unha posibilidade de traballar e que ese traballo sirva para retribuír dignamente" ás persoas.

"Máis aló de estar na defensa dos conflitos dos traballadores no ámbito concreto, queremos establecer un marco de relacións estable co conxunto do movemento sindical", expresou.

"Pedimos ser interlocutores, queremos ser o referente da clase traballadora no Parlamento de Galicia e estaremos a traballar incansablemente para a modificación dentro e fóra do Parlamento do marco de relacións laborais --para-- que consigan trasladar unha condicións de vida xustas para o conxunto dos traballadores", destacou.

COLABORACIÓN

Na súa quenda, o secretario xeral de CC.OO. alertou de que Galicia sexa "a cuarta comunidade con maior taxa de pobreza" e do feito de que "seis de cada dez pensionistas" perciben "ingresos por baixo do limiar da pobreza".

Isto, ao seu xuízo, é "resultado da nefasta xestión do PP, especialmente en Galicia", que xerou "máis desigualdade, cada vez menos protección social, máis paro, emprego precario e emprego lixo".

Por iso, ante o inicio dunha nova lexislatura, advertiu de que "de non cambiar estas políticas vai seguir na mesma senda" do "espolio dos sectores públicos para favorecer aos sectores privados", e trasladou a súa disposición de "colaborar de fronte ao futuro para que --prosperen-- as propostas en defensa da maioría social".