PSOE e Ferreiro non acercan posturas
O rexedor coruñés interpreta as críticas socialistas como "chantaxes" para formar un goberno de coalición.
Pazo de María Pita, sede do goberno local da Coruña. //Foto: turismo.gal
O alcalde da Coruña, Xulio Ferreiro, rexeitou "chantaxes" por parte do PSOE, a quen acusou de querer formar un goberno de coalición "a base de golpes".
"Creo que non se constrúe un proxecto en común ou non se pretende formar un goberno conxunto a base de golpes", dixo, a preguntas dos xornalistas, en relación á advertencia lanzada desde as filas socialistas, que responsabilizan ao rexedor dos problemas da Coruña tras o seu rexeitamento a unha coalición.
Ferreiro chegou a cualificar estas advertencias como "chantaxe". "Chantaxe, extorsión ou non se cal é o nome", puntualizou o rexedor herculino, que lembra que "todo era posible" se se conseguía establecer unha relación de confianza co PSOE.
Con todo, ao seu xuízo, a actitude que teñen os socialistas é a de "golpear, debilitar e chantaxear o goberno dicíndolle que se queredes que as cousas sexan fáciles tedes que meternos no goberno, se non imos facervos a vida imposible", indicou o rexedor, en referencia á actitude que manteñen os socialistas co goberno local da Coruña.
MOCIÓN DE CONFIANZA
Aínda que lembra que a moción de confianza é unha "opción que está aí", insiste en que antes tratarán de negociar os orzamentos co PSOE para evitar ter que acudir a este tipo de ferramenta.
O alcalde da Coruña realizou estas declaracións coincidindo coa súa presenza na inauguración dunhas xornadas de políticas locais de emprego na Universidade da Coruña.
Escribe tu comentario