Un estudo di que o 'Brexit' é unha "grande oportunidade" para aumentar as cotas pesqueiras galegas

Un estudo do Instituto Salvador de Madariaga, encargado pola Consellería do Mar, conclúe que o 'Brexit' pode ser unha "gran oportunidade" para poder cambiar o principio de estabilidade relativa que afecta o Estado español desde a súa entrada na UE --polo que se reparten as posibilidades de pesca--, o que abriría a porta a un aumento de TAC e cotas para a frota galega.

Así o explicou o profesor da Universidade da Coruña José Manuel Sobrino Heredia en declaracións aos medios este martes, antes de presentar este estudo ao sector no Consello Galego de Pesca celebrado en Santiago.

Este informe será remitido pola Xunta ao Goberno central co fin de que poida empregalo en futuras negociacións en defensa dos dereitos da frota galega e española.

"A retirada dun dos países que máis se beneficiou do sistema de repartición de posibilidades sobre a estabilidade relativa, como é o caso de Reino Unido, podería ser a ocasión para revisar este criterio", conclúe o estudo.

Por tal motivo, Sobrino sentencia que "é un momento de gran oportunidade e hai que aproveitala". Todo iso, despois de que España recorrese en numerosas ocasións o principio de estabilidade relativa, por consideralo prexudicial para a súa frota, sen obter resultado.

INFORME

O informe divídese en dúas grandes partes. Por unha banda, o desenvolvemento do procedemento de 'desconexión' de Reino Unido da Unión Europea, no que se examina "que modelo de acordo se pode chegar a concluír con este país" para as futuras relacións coa UE, no que se avalían exemplos existentes como as relacións con Canadá ou Suíza, coas consecuencias que pode determinar para "o sector pesqueiro galego en particular".

Por outra banda, analízase os ámbitos e materias onde "hai un interese para a pesca en Galicia", que "poderían ser afectados positiva ou negativamente coa retirada do Reino Unido".

Con todo, deixa claro que a estas alturas "son máis ben conxecturas que realidades", á espera de que se materialice a marcha de Reino Unido da UE, "pero xa se poden adiviñar algúns trazos para empezar a preparar unha negociación en defensa dos intereses" da frota autóctona.

NEGOCIACIÓN

Sobre este extremo, Sobrino apunta que "haberá que asinar un acordo de pesca co Reino Unido e eles necesitarán vender os seus produtos de pesca", e "o único mercado que hai nestes momentos, que é insubstituíble, é o europeo". "Se eles queren vender o seu peixe terán que deixarnos tamén pescar nas súas augas, hai que negociar", asevera.

A continuación, remarcou que os británicos "son uns excelentes negociadores" e "nunca dan o seu brazo para torcer", pero "se Europa nestes momentos se prega, detrás de Reino Unido, e como froito do efecto chamada, van vir outros países".

Respecto diso, reflexiona sobre como "a retirada dun país que está detrás do principio de estabilidade relativa e unha distribución que non beneficia a España" vai significar que "hai que reformular" ese principio, "porque as circunstancias cambiaron e porque o dereito o permite".

"É unha posibilidade de negociar algo que ata agora era innegociable" en prol dun novo sistema de distribución de TACs e cotas. A isto únese que o Reino Unido se vai retirar de "espazos que nestes momentos a súa frota está a utilizar" en augas comunitarias e "haberá que repartir" esas posibilidades" entre as frotas que quedan.

ASPECTOS NEGATIVOS

O estudo identifica aspectos positivos e negativos, e Sobrino pon como exemplo dos riscos que "se se aposta por un 'Brexit' duro significa que Reino Unido sae do mercado interior e que, por tanto, xa non funciona a libre circulación de mercadoría", o cal se traduciría en que "todos os produtos" pesqueiros que se consomen actualmente en Europa procedentes deste país "serían moito máis caros, porque serían gravados con aranceis e dereitos aduaneiros".

Unha cuestión que "ten unha repercusión, non só no Reino Unido, senón tamén en Galicia, que produce eses produtos con frota de pavillón hispano-británico e porque se importan eses produtos para o mercado".