Alerta laranxa na costa por temporal

A Xunta decretou a 'alerta laranxa' para o litoral galego desde esta pasada madrugada debido ao temporal que azouta as zonas costeiras das provincias da Coruña e Pontevedra.

Segundo as previsións da Axencia Estatal de Meteoroloxía (Aemet) espérase mar combinada de oeste ao noroeste de 5 a 6 metros e, ocasionalmente, oeste forza 8 nas ditas provincias.

Así, a Dirección Xeral de Emerxencias e Interior informou aos concellos das provincias afectadas, así como ás Deputacións, servizos provinciais, Protección Civil e clubs náuticos, entre outros.

Desde o CAE 112 Galicia lembran á poboación a importancia de seguir as medidas de prevención como "evitar aproximarse a diques ou rompentes co fin de previr un eventual golpe de mar que poida arrastrar persoas ou obxectos" e tamén vixiar a posible caída de elementos "desde balcóns e xanelas".