Intérpretes galegos, preocupados pola escasa produción do CDG para 2017

A Asociación de Actores e Actrices de Galicia (AAAG) emitiu este venres un comunicado no que expresou a súa "inquietude" e "decepción" ante a "escasa produción" e a "baixa contratación actoral" que desenvolverá o Centro Dramático Galego (CDG) durante a súa tempada 2017.

Tras a presentación esta semana da programación da compañía pública para 2017, a asociación lembrou que o CDG adaptará dúas pezas de Valle-Inclán ao galego, 'As galas do defunto' e 'A filla do capitán', deixando, con todo "coxa", a triloxía 'Martes de Entroido', xa que non se fará o mesmo con 'Os cornos de Don Friorenta'.

A asociación criticou que esta decisión se tomou "por cuestións orzamentarias que non responden a criterios artísticos" e lamentou que toda a produción do CDG para 2017 quede "reducida a unha obra" que, "por moito que sexa un espectáculo dobre, non deixa de ser unha única montaxe cunha única estrea e unha única xira por Galicia".

Finalmente, a AAAG criticou que o elenco destas pezas vaia a estar formado "unicamente por 10 intérpretes", un "volume de contratación totalmente inaceptable" por parte dun Centro Dramático, que "ha de recuperar o seu papel de teatro nacional" para Galicia.

Fronte a isto, a asociación reclamou que o CDG "incremente a súa produción anual" e que as producións que leve a cabo aumenten os seus elencos, á vez que pediu que se recupere o Consello Asesor como "espazo de diálogo" coa profesión.