Silva, tras a bronca co PP no Hórreo: "Eu son feliz na política, hai xente que non"

|

Carmelasilvahorreo


A titular da Deputación de Pontevedra, Carmela Silva, protagonizou un encontronazo coa popular Cristina Romero (que exercía como presidenta da comisión parlamentaria na que comparecía a socialista) e con outros membros do PP no Pazo do Hórreo, onde acudiu debullar os orzamentos da institución para 2017.


A confrontación arrincou tras unha dura intervención do deputado popular Alberto Pazos Couñago, quen reprobou a xestión de Deputación pontevedresa. En concreto, cargou contra Silva, acusándoa de impoñer o "silencio" nunha especie de "lei da omertá" --a lei do silencio da mafia siciliana-- a quen discrepa con ela na política.


"Vostede só atende a unha lei: comigo ou contra min. E se alguén ten algunha dúbida disto sempre lle pode preguntar ao señor Leiceaga", afeou Pazos, cuxa "terrible intervención" foi o primeiro que reprobou Silva cando volveu retomar a palabra. "Vostedes menten e tentan ocultar unha xestión vergoñosa, clientelar e caciquil", apostilou.


Cristina Romero, que exercía de presidenta da Comisión de Economía en substitución do socialista Abel Losada (quen exerceu de portavoz do seu grupo na comparecencia), instou a Silva a ser "respectuosa" e defendeu que non se pode dicir que "un deputado mente", á vez que pediu retirar do acta da sesión a afirmación da socialista.


"Vou manter que acuso ao PP de mentir e quero que conste en acta. A súa obrigación é ser obxectiva e non ter unha posición de parte. Creo que Manuel Baltar cualificou de ignorantes aos deputados e non dixo nada, así que non se pode falar de trato idéntico. Claro que tamén estou afeita a esta forma de actuar", esgrimiu.


"PARTIDO DA CORRUPCIÓN"


Ao tempo, e tendo en conta que Carmen Santos (Podemos) censurara a presenza de "familiares de membros do PSdeG" entre o seu "persoal de confianza", Silva instouna a "non danar a política" e enxalzou os "currículos envexables" dos seus asesores.


"Teño o mellor gabinete de ningunha administración, que traballa 15 horas ao día", exemplificou, antes de engadir que non se dedicaría "a falar dos familiares que contratou Ada Colau nin de como o portavoz de En Marea na Cámara (Luís Villares) se dedica a pedir máis recursos".


"Pero teña moito coidado con esas afirmacións, danan a política e non son certas", agregou, antes de volver criticar ao PP e de contrapoñer "as súas mans limpas" coas afirmacións "do partido da corrupción". Chamada á orde por Cristina Romero, Silva foi a última en intervir para volver queixarse do trato recibido.


Finalizada a comisión, dirixiuse a saudar aos distintos grupos, incluídos varios deputados do PP. Un deles, o parlamentario Daniel Veiga espetoulle que "sobraba o do partido da corrupción" e instouna, visiblemente molesto coa súa intervención, a mirar cara ao seu propio partido.


"POÑO MOI NERVIOSO AO PP"


Posteriormente, en declaracións aos medios, Silva aludiu á "insultante" intervención de Pazos e interpretou que se dedicou a "descualificar" porque a xestión da Deputación de Pontevedra é "espectacular". "É o seu modelo, o que fan os populares comandados por Alfonso Rueda, denigrar ao adversario. Detrás de todo isto está o modelo do señor Rueda e do señor Feijóo de confrontación total co adversario político", espetou.


A presidenta provincial insistiu en que "o ataque persoal e a descualificación" non van calala e en que seguirá "facendo políticas para as persoas" e traballando para "desenmascarar ao PP, que fai moita propaganda, pero ten abandonadas a Pontevedra e Vigo".


"ÉTICA TOTAL E ABSOLUTA"


"Poño moi nervioso ao PP. É sorprendente a falta de tacto e de elegancia; eu dixen con bo ton e contundencia o que pasaba: o portavoz do PP non faltaba á verdade, senón que mentía", sinalou, convencida de que o que "preocupa" ao PP é que "buscou algo" que a poida poñer en "cuestión", pero non o conseguiron dada a súa "ética total e absoluta".


"As miñas mans están igual de limpas que o día que entrei en política e non todos poden dicir o mesmo. A lista de imputados do PP é interminable", sentenciou, para concluír que, en todo caso, non lle "afecta" o ocorrido e vaise "encantada" do Parlamento de Galicia, despois de presentar "un orzamento extraordinario".


O premio, segundo defendeu ante os xornalistas, é que cando vai pola rúa "a xente sorrille, empatiza e agradece os cambios de política" na Deputación. "E eu son moi feliz na política. Hai xente que non, eu tamén o entendo. Non se pode ser igual de feliz cando se traballa para a xente que cando se traballa para os intereses partidistas", resolveu.


REPROCHES POLO AVE


Ademais, Carmela Silva, denunciou o "abandono" ao que a Xunta e o seu presidente, Alberto Núñez Feijóo, "someten" á provincia e tamén á cidade de Vigo. Acompañou a crítica dunha ladaíña de esixencias de atención á provincia en diversos ámbitos, entre elas que Pontevedra "non quede descolgada do AVE" e o fin da "inxustiza" das "elevadas peaxes" da AP-9.


"Abandono que obriga á Deputación de Pontevedra a asumir competencias que non lle corresponden e asumir gastos aos que tería que facer fronte a Administración autonómica. Gastos en políticas sociais, cultura, emprego, promoción económica , gandería, pesca, na loita contra as violencias machistas, en infraestruturas e no deporte", resumiu, na súa comparecencia na Comisión de Economía da Cámara.

relacionada Carmela Silva pide a Cancela que "deixe de enredar" e "dea un paso atrás"
relacionada ​Carmela Silva critica que Rajoy formase un Executivo sen galegos e non paritario
relacionada Empresarios de Vigo piden 'pelexar' polo AVE por Cerdedo

Sin comentarios

Escribe tu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Este periódico fue seleccionado por Google News Initiative para su Journalism Emergency Relief Fund

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress