As redeiras non terán dereito a beneficiarse de reductores da idade de xubilación

O Goberno central vén de responder a En Marea que considera que as redeiras non deben beneficiarse de coeficientes reductores da idade de xubilación.

Así o contestou o Goberno, tras unha pregunta por escrito no Congreso de En Marea, que apunta que estes coeficientes reductores "está prevista, unicamente, para aquelas actividades profesionais de natureza excepcionalmente penosa, tóxica, perigosa ou insalubre nas que se acusen elevados índices de morbilidade ou sinistralidade". No caso das redeiras "non se apreciaron ningunha das características", aínda que admite que a súa actividade "pode desenvolverse en condicións non moi saudables".

Respecto diso, a deputada de En Marea Alexandra Fernández cre que "ofrece unha resposta contraditoria", xa que "implicitamente, e aínda que sexa parcialmente, está a recoñecer que fan o seu labor en condicións non moi saudables, á vez que afirma que non contan coas características".

Neste sentido, Alexandra Fernández remarca que esta é unha "demanda histórica" que "levan anos reclamando unha redución da idade de xubilación debido ás condicións de penosidade e insalubridade que reviste o labor de tecer e reparar redes".

Así, sinala que este traballo "leva numerosas doenzas derivadas desta actividade profesional" pois "pasan moitas horas reparando horas reparando redes na mesma posición o que lles provoca enfermidades relacionadas co aparello muscoesquelético como artrose, lumbalxias e outras doenzas".

En Galicia hai máis dun milleiro de persoas dedicadas a este labor, das cales máis do 80 por cento son mulleres, que "levan décadas loitando pola dignificación dos seus empregos".