Madrid e A Coruña estudan crear redes para superar o "afogo institucional"

A alcaldesa de Madrid, Manuela Carmena, mantivo este mércores unha reunión co rexedor da Coruña, Xulio Ferreiro, na que avogaron por crear redes que poidan servir para superar "o abafo do corpiño que a propia engrenaxe institucional creou para facernos desistir de políticas alternativas".

No encontro ambos os mandatarios compartiron que, dado que forman parte dos líderes que abriron "novas etapas" tras as pasadas eleccións municipais de maio -a madrileña á fronte de Agora Madrid e Ferreiro da Marea Atlántica- poden abrir espazos "desde a unión e a cooperación" na arquitectura administrativa actual para "devolver o protagonismo á xente".

O rexedor herculino avanzou a súa intención, mesmo antes de ser investido alcalde o pasado 13 de xuño, de conformar unha rede de concellos rebeldes da que formen parte ademais Compostela e Ferrol, Madrid e Barcelona, para conformar xuntos unha metodoloxía, códigos éticos e propostas programáticas para a sociedade.

"Gobernos locais como os da Coruña, Madrid, Barcelona ou Compostela podemos exercer forza ante as limitacións que nos pon o PP, por exemplo coas políticas do ministro Cristóbal Montoro, que coas súas imposicións restritivas impide contratacións ou esixe unha ríxida estabilidade orzamentaria cun claro compoñente ideolóxico de parte", sostivo Ferreiro na súa intervención.

Como exemplo das políticas que segundo o alcalde limitan as súas competencias, citou a nova Lei de Réxime Local, coa que se abriu un proceso "no que se tenta afastar á cidadanía da toma de decisións", explican fontes municipais da Coruña sobre o contido da reunión.

Neste sentido, ambos os rexedores coincidiron en sinalar á Federación Española de Municipios e Provincias como unha ferramenta para traballar en común "e reverter esas políticas".

Acordaron tamén iniciar unha "interlocución permanente", que se estenderá a outros concellos, sobre a creación de liñas de intercambio de ideas continuas entre os gobernos mediante un código aberto para cooperar ante problemáticas compartidas.

Outro dos temas que Carmena e Ferreiro trataron durante a reunión foi o relativo á vivenda e como conseguir inmobles públicos para polos a disposición de quen os necesiten.

"Para atallar este problema hai distintas cousas que se poden facer e que estamos a pór en práctica, como falar coas entidades bancarias para que os seus pisos baleiros sexan cedidos e pasen a disposición dos concellos ou dos gobernos autonómicos para que poidan ser empregados para realojos", destacou o alcalde sobre unha iniciativa que puxo en marcha na Coruña con Abanca.

Pola súa banda, tamén o Concello madrileño ha destacado "o problema cidadán que supoñen os desafiuzamentos e a necesidade de traballar por Consistorios máis transparentes, próximos e abertos á cidadanía", e coincidiu coa Coruña na necesidade de continuar con este tipo de reunións para "aumentar a cooperación e o traballo conxunto entre os concellos de ambas as cidades".

Así mesmo, a concelleira de Participación e Innovación Democrática da Coruña, Claudia Delso, mantivo outra reunión co seu homólogo madrileño, Pablo Soto, na que tamén falaron de formas de traballo "en rede" sobre temas relativos a participación cidadá, que previamente compartiron con representantes dos gobernos locais de Barcelona ou Zaragoza.

Sobre a corrupción política, o rexedor herculino tamén dixo hoxe que a cidadanía dixo "basta" nos pasados comicios porque é "unha contradición" que "mentres se recetan recortes, aparecen casos de políticos que gastan e aprovéitanse do público".