O científico Ángel Carracedo, recibe hoxe en Cordoba o Premio Nacional de Xenética

O catedrático da Universidade de Santiago de Compostela Ángel Carracedo Álvarez recibe este venres 18 na Universidade de Córdoba o Premio Nacional de Xenética concedido pola Sociedade Española de Xenética. 

É un dos poucos premios que lle quedaban por recibir a Anxo Carracedo na súa longa e frutífera carreira, que o levou a converterse nun dos grandes referentes internacionais no ámbito da xenética.  

Ángel Carracedo recibe o premio polo seu labor pioneiro no desenvolvemento de novas tecnoloxías para a identificación forense baseadas na xenética molecular, que tiveron unha grande proxección internacional, así como polas súas notables achegas nos ámbitos da xenética forense, clínica e de poboacións. 

O xurado destaca ademais as contribucións do catedrático da USC á oncoloxía clínica e ao establecemento das bases moleculares de varias enfermidades mentais e vasculares. Tamén foi considerado o traballo de Carracedo e do seu equipo na parte asistencial, “ realizando decenas de miles de probas xenéticas para a detección de enfermidades raras, moitas delas con tecnoloxía propia”.

A Carracedo, catedrático de Medicina Legal na Universidade de Santiago, director da Fundación Pública Galega de Medicina Xenómica (Sergas) e responsable do Centro Nacional de Genotipado (ISCIII), faille especial ilusión que o premio recoñeza tamén o seu traballo no ámbito clínico e asistencial. Desde a fundación que dirixe realízanse cada ano 10.000 probas xenéticas -10.000 de cancro e 10.000 de enfermidades raras- , para as que desenvolveron innovacións tecnolóxicas e metodológicas propias, o que os levou a ser referentes mundiais en cancro hereditario, morte súbita de orixe cardíaca, xenética endocrinológica e neurogenética. «No grupo -admite- sempre nos gustou ser punta de lanza en innovacións tecnolóxicas e metodológicas». O seu equipo é tamén o líder internacional na área de medicamento forense.

Ginés Morata

O Premio Nacional de Xenética na modalidade de investigación básica foi a parar a outro destacado científico, como é o caso de Ginés Morata, que xa foi recoñecido co Príncipe de Asturias de Investigación Científica e Técnica. O xurado valorou as súas contribucións á «xenética do desenvolvemento» e o descubrimento da «competición celular».