Os empresarios galegos, divididos

O presidente da CEG, José Manuel Fernández Alvariño 

A Confederación de Empresarios de Galicia (CEG) está dividida. Unha división producida, en parte, polo conflito interno, e xudicializado, que se vive na Confederación de Empresarios de Pontevedra tras as súas polémicas eleccións.

Este xoves, as catro patronais provinciais estaban chamadas a un encontro para tentar solucionar a situación pero nin a Confederación da Coruña, nin a de Lugo decidiron asistir. Só se presentaron as de Pontevedra e Ourense.

Por iso, o presidente da patronal pontevedresa, Jorge Cebreiros, cuestionado por unha boa parte da súa provincia, apelou á "colaboración" das catro organizacións provinciais para superar a crise que vive a CEG. “Pontevedra e Ourense puidemos facer un oco na nosa axenda para asistir á xunta de vicepresidentes da CEG, e parece ser que outros, non", dixo.

Nesa reunión, o presidente da CEG, José Manuel Fernández Alvariño, propuxo unha serie de medidas para garantir tanto a "viabilidade" como o "prestixio" da patronal galega, unha delas a existencia dun "goberno colexiado". Tal órgano estaría conformado polo presidente e o catro vicepresidentes.

Tamén expuxo Alvariño entregar ao secretario xeral un plan de viabilidade da institución que, acordado por todos, defina orzamento, persoas e funcións da "CEG do futuro". Ademais pediu que se convoque a todos os órganos de goberno, comité executivo, xunta directiva e asemblea xeral, para a aprobación das contas e das propostas presentadas.

Críticas

Sen embargo, desde o sector crítico indican que o problema estriba en que, desde a actual Xunta directiva, rexeitáronse as contas e orzamentos da Comisión de Economía, que aínda non se xuntou para aprobar, novamente, esas contas.

“O primeiro que ten que facer Alvariño é impulsar a celebración dunha reunión da Comisión de Economía. Todo o demais é fume e tinta de lura”, apunta a GC unha fonte coñecedora da situación interna da CEG.

O presidente provisional da comisión é José Manuel Pérez Canal, que aceptou substituír provisionalmente a Luis Novoa tras a renuncia deste. Pero, desde xuño hai unha “parálise total e absoluta” na CEG, segundo os críticos. Unha situación que continuará ata que non se xunte a Comisión de Economía. “É algo totalmente antiemocrático e demostra o proceder personalista da CEG de Alvariño”, apunta esta fonte.