As medidas de Europa agravan a crise do sector lácteo

O Sindicato Labrego Galego amosouse sumamente crítico co paquete de medidas proposto este luns pola Comisión Europea. Consideran que lonxe de solucionar a crise de prezos do sector, agravan aínda máis a súa situación, sen achegar solucións reais e facendo ouvidos xordos ás peticións do propio sector nos diversos países comunitarios..

Aseguran que o que se demanda dende o sector leiteiro é "un  regulamento da produción público e igual para toda a Unión Europa". A proposta de Europa, pola contra, supón unha redución voluntaria temporal e por estados, algo que segundo o sindicato significa "devolverlle o problema ao sector, fomentando unha guerra interna entre países pola ocupación do mercado" que xa se está producindo. 

Outra das propostas da Comisión Europea foi duplicar o volume de intervención do leite en po desnatado -pasando de 109.000 a 218.000 toneladas- e da manteiga -de 50.000 a 100.000 tn-, algo que para o SLG "tampouco serve de nada".  Para o SLG e para a Coordinadora Europea da Vía Campesina (ECVC) esta medida só podería ser útil "se vai aparellada a unha regulación obrigatoria da produción; senón, tal e como fixeron agora, o único que conseguimos é conter malamente o problema durante uns meses".

Por último, aumentar as axudas dos estados ata 15.000 euros por explotación e sen teito máximo por países significa para o sindicato "lapidar o diñeiro das arcas públicas comunitarias para compensar o roubo que están a perpetrar industrias lácteas e distribuidoras alimentarias ao pagar o leite por baixo dos custes de produción", subvencionando "a extorsión a que as empresas do sector someten ás granxas, que seguirán a desenvolver unha actividade ruinosa nas condicións actuais".

Fronte ás propostas de Europa, propón solucións alternativas que pasan por regular a produción cunhas regras de obrigado cumprimento e iguais para toda a UE que teñan por obxectivo axustar a oferta á demanda. O problema para eles radica en que "a Comisión non está buscando solucións para o sector; o que semella buscar, realmente, é perpetuar a actual situación para maximizar o lucro das grandes corporacións do sector lácteo e distribuidoras alimentarias, que están a facer o agosto coa actual crise.