Comeza a tempada de pesca nos ríos galegos

A tempada de pesca en Galicia este ano irá desde este domingo, 20 de marzo, ao 31 de xullo con carácter xeral para augas continentais, coa excepción de augas salmoneiras e para as masas de auga de montaña, nas que comezará o 1 de maio.

Segundo informa a Xunta, esta tempada conta con 300.000 permisos de captura, unha cifra similar á do ano pasado, nun total de 149 cotos fluviais --un máis que a campaña pasada, ao sumarse o de Carboeiro no río Deza--.

Este ano cóntase con 68 tramos libres habilitados para a mobilidade da pesca sen morte. Deles, 12 son novos: 4 na Coruña (ríos Anllóns, Quenxe, Sóñora e Bardoso); catro en Pontevedra (no río Verdugo e tres tramos no Xabriña); tres en Ourense (ríos Edo, Loña e Salas) e un en Lugo (río Requeixo).

Na campaña de troita, do 20 de marzo ao 31 de xullo, a tempada amplíase ata o 30 de setembro nos casos de pesca sen morte e en cotos de pesca intensiva, así como nos cotos con convenio. Por norma xeral establécese a posibilidade de capturar 10 exemplares ao día e por persoa, cunha talla mínima de 19 centímetros.

SALMÓN

No salmón, o período xeral será do 1 de maio ao 31 de xullo, pero poderá adiantarse o fin de tempada en función das cotas de captura, e haberá un período específico nos cotos compartidos con Asturias. A cota de captura está establecida nun exemplar por persoa e xornada, cunha dimensión mínima de 40 centímetros.

Nos ríos Lérez e Ulla mantéñense as cotas anuais de 15 e 60 exemplares, respectivamente. Por provincias, as cotas de capturas de salmón serán bastante similares, con cinco exemplares no río Mandeo (A Coruña); soben ata 15 exemplares no río Masma e baixan ata 10 exemplares no coto de Salmeán (no río Eo, en Lugo). Pola súa banda, no río Miño (Ourense), serán oito exemplares como máximo.

Respecto ao reo, mantense o período entre o 1 de maio e o 31 de xullo, prolongándose ata o 30 de setembro nalgúns cotos na modalidade de pesca sen morte, como en Padrón, Noia, Celeiro ou Viveiro.

XORNADAS E ESPECIES EXÓTICAS

Tal e como recolle a normativa, con carácter xeral, decláranse os luns inhábiles para a pesca, excepto os festivos nacionais ou autonómicos. Ademais, os xoves non festivos só se poderá practicar a pesca sen morte.

Na normativa que publica o DOG, tamén se aclaran as condicións de capturas de especies exóticas invasoras como cangrexo vermello americano ou ciprínidos, coa excepción de que neste último caso limítase a un máximo de dous anzois por cana con carácter xeral para encoros nos que se autoriza a pesca todo o ano. Tamén se mantén a veda de anguía e 'meixón'.