​Traballadores dunha auxiliar de Navantia dan o último aviso antes da folga

Os 90 traballadores da empresa encargada da prevención, enfermería e loita contra incendios nos dous estaleiros de Navantia en Ferrol (Spril Norte) realizarán varios paros durante a xornada deste venres, última advertencia para a patronal antes de comezar unha folga indefinida o vindeiro luns de maio.

Reclaman o pago dos salarios do mes de marzo, que segundo indican deberían cobrar o pasado 5 de abril e aínda non ten chegado. "A empresa decidiu abandonarnos aquí, deixarnos á nosa sorte, sen dar a cara" e coa "intención de iniciar un concurso de acredores, tal e como lles trasladou aos compañeiros da Bahía de Cádiz", asegurou José Carlos Martínez Prieto, presidente do comité de empresa de Spril Norte nos centros de traballo de Ferrol.

Sinalan que a culpa non é de Navantia, que “está a cumprir coa súa obrigación e paga á compañía". "O que pasa é que os responsables da mesma desapareceron e non dan explicación de ningunha clase e non entendemos cal é a súa pretensión con esta actitude", afirmou.

CONTINUIDADE DOS TRABALLADORES

Os traballadores de Spril Norte, unha empresa pertencente ao Grupo PFA, con sede en Madrid, tamén trasladaron nunha comparecencia ante os medios de comunicación que a actual encomenda realizada por parte da compañía naval pública finaliza o próximo 30 de xuño, cando se cumpren cinco anos desta adxudicación.

O representante social alertou de que "acaba de saír recentemente a licitación para o novo contrato e na mesma non está contemplada a obrigatoriedade da subrogación do actual persoal".

José Carlos Martínez aproveitou para reclamar "a continuidade dos traballadores coas mesmas condicións e con todo o que hai asinado, como bolsas de emprego, algo que custou moito lograr".

Criticou que "moitas empresas veñen presentando propostas á baixa e que logo os traballadores son os primeiros en sufrir esta política, con recortes e expedientes abusivos", no mellor dos casos.