"Alternativas laborais" para os 'manteiros' da cidade da Coruña

A Concellería de Igualdade do Concello da Coruña puxo en marcha unha mesa de traballo co colectivo de manteiros dedicados á venda ambulante na cidade para facilitarlles "o acceso a unha vida normalizada a través de alternativas laborais".

Nun comunicado, a concelleira de Igualdade, Rocío Fraga, asegura que o obxectivo é establecer "unha folla de ruta" para poder mellorar "as condicións destas persoas" cunha integración "que pasa en gran medida polo acceso ao traballo".

A reunión contou tamén coa presenza de membros de entidades de ámbito social que traballan con este colectivo, ademais de representantes da Unidade Municipal de Atención a Persoas Migrantes (UAMI).

ITINERARIOS

Sobre esta iniciativa, a concelleira de Igualdade asegura que a intención é "levar a cabo unha tarefa de mediación para conseguir normalizar a situación deste colectivo sen que entre en conflito co desenvolvemento doutros", explica.

Ademais, precisa que o seu departamento colaborará coa área de Emprego e Economía Social para impulsar "unha serie de itinerarios laborais axustados ás necesidades e a situación deste colectivo".