Nin se ve nin se cheira, os perigos do monóxido de carbono
Este gas orixínase ao queimar leña ou gas. Para evitar unha intoxicación recoméndase ventilar con frecuencia e apagar as chamas durante a noite.
A Consellería de Sanidade lembrou aos cidadáns a importancia de protexerse ante intoxicacións por monóxido de carbono. E é que este é un gas que non se pode ver nin cheirar, e que se produce ao queimarse combustibles orgánicos como gas butano ou propano, gasolina, queroseno, gasóleo, carbón, petróleo ou madeira.
As chemineas, as caldeiras, os automóbiles e todos os aparellos domésticos que queiman combustible consomen osíxeno e producen monóxido de carbono, tal e como precisou o Goberno galego nun comunicado.
A intoxicación por monóxido de carbono, sinalou, pode ser fatal, pois se se respira en cantidade elevada pode causar a morte por intoxicación en poucos minutos. As mulleres embarazadas, os bebés, os nenos pequenos, as persoas maiores e as que padecen anemia, problemas de corazón ou respiratorios son as máis sensibles á súa presenza.
Os síntomas de intoxicación por monóxido de carbono son moi específicos e similares aos de enfermidades comúns como a gripe ou as intoxicacións por alimentos en mal estado.
En baixas concentracións no aire, o monóxido de carbono pode causar falta de alento, náuseas e mareos lixeiros. Con todo, ao incrementar a súa concentración, causa dores de cabeza, mareos e náuseas intensas, confusión mental progresiva e esvaecemento, chegando mesmo a causar a morte se se segue respirando durante un tempo suficiente.
Non é aconsellable a utilización dun braseiro tradicional de leña na vivenda, pero se é preciso facelo debe estar á vista, a estancia debe ventilarse con frecuencia e debe ser retirado ou apagado sempre durante as horas de sono.
Escribe tu comentario