​Máis de 3.000 pacientes do Chuvi pediron cambiar ao centro concertado Povisa

Un total de 779 pacientes da área sanitaria de Vigo solicitaron cambiar o seu centro de referencia do Hospital Povisa ao Complexo Hospitalario Universitario de Vigo (Chuvi), mentres que 3.215 pediron o cambio do Chuvi ao centro concertado.

Así o comunicou este martes o Servizo Galego de Saúde (Sergas), que manifestou que do total de peticións de cambio a Povisa, denegáronse as 177 últimas recibidas, ao alcanzar o centro a cifra tope de 139.000 pacientes que establece o convenio.

Como resultado deste proceso, que permite que os usuarios elixan libremente o seu hospital de referencia, 779 cambiáronse ao Chuvi e 3.038 a Povisa, sendo o saldo final de 2.259 pacientes incorporados ao centro concertado. O Sergas destacou que os cambios a Povisa prodúcense no ámbito de residentes desa contorna, e cara ao Chuvi en usuarios de Val Miñor e Coruxo.

A pesar de todo, o Sergas subliñou que do total de 71.039 usuarios que podían elixir Povisa como centro de referencia para atención especializada, "tan só solicitaron o cambio 3.215 persoas, o que representa o 3,1 por cento". Trátase dunha cifra que, ademais, supón un descenso do 52 por cento respecto ao pasado ano, cando se rexistraron 6.548 peticións, tal e como lembrou.

Para ofrecer o dereito a libre elección de centro, o Sergas abre anualmente un período entre o 1 e o 30 de novembro para recoller as peticións. O cambio é efectivo coa presentación da solicitude e a adscrición polo Sergas, e implica a permanencia do usuario ata a apertura da seguinte convocatoria.