​En Marea acorda que a dirección do partido saia dunha "lista de consenso"

O portavoz parlamentario de En Marea, Luís Villares, mostrouse "moi satisfeito" polo acordo, ao seu xuízo "inmellorable", alcanzado pola coordinadora para impulsar unha candidatura única para o Consello das Mareas.

O acordo foi alcanzado este mércores para as próximas eleccións ao Consello das Mareas e foi "unánime", segundo resaltou Villares, en declaracións a Europa Press este xoves.

Así as cousas, o portavoz de En Marea na Cámara galega destacou que o seu "compromiso" desde "o primeiro momento" foi apostar por esta "candidatura de consenso" que axunte todas as sensibilidades. "Que mellor marco que a dirección para tratar de chegar a toda a militancia", agregou.

A partir de agora, Villares marcouse o obxectivo de "escoitar a todo o mundo" que teña achegas para facer, tanto no ámbito programático como no das persoas, para configurar esa lista "de confluencia" nun proxecto "cooperativo e non competitivo". Ao seu xuízo, existe "vontade de todo o espazo" por chegar a ese acordo.

CARTA AOS INSCRITOS

Neste escenario, a coordinadora dirixiu unha carta aos inscritos de En Marea lembrando que o próximo día 10 se abre o prazo de presentación de candidaturas ao Consello das Mareas.

Lembra que esta será "a primeira dirección electa de En Marea" e que responderá os compromisos que se asumiron na asemblea de Vigo.

Ademais, a coordinadora pediu aos inscritos, tras a reunión deste mércores, que contribúan a construír esta candidatura e apuntou que segue activa a plataforma para inscribirse --a inscrición é un requisito imprescindible para participar--.