Varios accidentes provocan longos atascos na entrada á Coruña

Foto: twitter

Un total de tres accidentes rexistráronse este mércores case de forma simultánea na Coruña co resultado de dous feridos leves, segundo informou a Europa Press a Policía Local.

Nun deles, víronse implicados un coche e un camión, o que provocou importantes retencións nos accesos de entrada á cidade pola avenida de Alfonso Molina debido ao corte de dous carrís.

Os accidentes producíronse ao redor das 7,50 horas nun caso no desvío de Alfonso Molina cara a Matogrande, pola colisión dun turismo e un camión, e noutro cara a Pocomaco, con sete vehículos implicados. No primeiro, resultou ferido de carácter leve o condutor do coche. O mozo, de 20 anos, foi trasladado a un centro hospitalario.

Tras o impacto, o vehículo foi retirado por un guindastre, mentres que o camión permaneceu inmobilizado na zona á espera de que un guindastre de grandes dimensións o retirase.

CARRÍS CORTADOS

Na zona, quedaron cortados dous carrís, o que provocou retencións nos accesos á cidade. Os bombeiros procederon, ademais, á limpeza da calzada.

A eles, sumouse outra colisión na coñecida como glorieta do Marineda. Neste caso, foi trasladada, para observación, unha muller de 36 anos que resultou ferida leve.