​Arde unha aula nun colexio de Caldas sen alumnos dentro

Un incendio rexistrouse na tarde deste xoves no colexio San Fermín de Caldas de Reis, na provincia de Pontevedra, segundo informa o 112. O centro estaba baleiro ao declararse á hora para comer.

O foco do lume localizouse na aula de plástica e, segundo unha testemuña que informou ao 112 sobre as 14,00 horas, o fume saía por un patio interior.

Na aula ardeu diverso material plástico e ao tratarse de elementos inflamables o fume expandiuse por todo o colexio. Unha dotación dos bombeiros do Salnés desprazouse ata o colexio para extinguir o lume e ventilar as instalacións.

O 112 informou tamén os membros do GES de Valga e a Protección Civil da localidade. Ademais, foi posto en coñecemento dos axentes da Policía Local.

INCENDIO EN CELANOVA

Por outra banda, un lume descontrolado provocou diversos danos materiais nunha casa en construción en Celanova. O incendio produciuse debido a unha explosión dun bote de poliuretano que había no seu interior, segundo relataron os bombeiros.

De feito, cando chegaron os bombeiros, o lume xa fora controlado polos albaneis que alí traballaban. Non se rexistraron danos persoais.

O alertante que chamou ao 112 indicou que se trataba dun lume descontrolado moi preto dunha zona residencial e dunha gasolineira, na parroquia de Vilanova dos Infantes.

Tras a chamada do particular, ao fío das 14,00 horas, o 112 pasou aviso aos bombeiros de Celanova, informou a Garda Civil, Policía Local e Protección Civil da localidade.