Alerta laranxa este martes na costa galega por ondas de máis de 5 metros e avisos tamén por fortes choivas

Gran parte da costa galega estará este martes en alerta laranxa por ondas que superarán os 5 metros de altura, mentres que tamén se esperan avisos amarelos por fortes choivas na Comunidade.

Segundo recolle Meteogalicia, todo o litoral da Coruña estará en alerta laranxa este martes, comezando xa no norte da provincia ás 09.00 horas e até as 12.00 horas do mércores, mentres que no sur será de 21.00 a 03.00 horas.

Pola súa banda, a costa pontevedresa e lucense estarán en alerta amarela por ondas de entre 4 e 5 metros durante toda a xornada.

Ademais, toda a provincia de Pontevedra, o interior, suroeste e oeste da Coruña estará en aviso amarelo por choivas de máis de 40 litros o metro cadrado en 12 horas.

Tamén haberá aviso amarelo por vento na Mariña de Lugo e aviso por vento no mar na Costa da Morte e no noroeste da Coruña, así como nas Rías Baixas.

Este luns, toda a costa coruñesa e pontevedresa entrará en alerta amarela por ondas de até 5 metros.

Por todo iso, co fin de garantir a seguridade dos bens e as persoas, o Goberno galego informou da situación a concellos, deputacións, servizos provinciais e agrupacións de Protección Civil, así como clubs náuticos, entre outros.

Ademais, suspenderase a actividade deportiva no mar, tanto federada como do programa Xogade, nos municipios afectados.