Méndez Romeu presentarase ás primarias do PSdeG
Anunciará a súa decisión o venres, tras contactar con distintas agrupacións e militantes
O voceiro parlamentario do PSdeG, Xosé Luis Méndez Romeu, enfrontarase a Xaquín Fernández Leiceaga e Gonzalo Caballero nas primarias do partido, previstas para o 28 de maio.
Nas últimas semanas o nome de Romeu sonou unha e outra vez como posible candidato, pero o voceiro parlamentario resistiuse a confirmar ou negar ningunha posibilidade.
O motivo deste silencio parece responder a que o veterán socialista está inmerso nunha ronda de contactos con distintas agrupacións e militantes, que se ultimará ao longo da xornada do xoves.
Pero foi imposible conter un secreto a voces. Romeu fará pública a súa candidatura o vindeiro venres e en principio contará co respaldo non explícito da agrupación máis numerosa do PSdeG en Galicia, a de Vigo.
PERFIL
Portavoz parlamentario desde 2013, foi deputado autonómico desde 1997 a 2004, cando foi chamado polo ministro Jordi Sevilla para ocupar a Secretaría de Estado de Cooperación Territorial.
Con todo, ao ano seguinte o agora expresidente da Xunta Emilio Pérez Touriño requeriuno para volver á Cámara galega e ser o seu conselleiro de Presidencia, posto no que se mantivo ata 2009 cando o PPdeG recuperou a maioría absoluta. Desde entón seguiu no seu escano, ata que a renuncia de Abel Losada á portavocía tras a elección de José Ramón Gómez Besteiro como secretario xeral o elevou a este cargo.
A pesar do seu labor destacado na política autonómica e estatal, a carreira deste pedagogo de profesión nacido na Coruña en 1951 arrincou no ámbito municipal, da man do exalcalde da cidade herculina Francisco Vázquez na década dos 80.
Será o terceiro militante socialista que fai pública a súa intención de aspirar á Presidencia da Xunta nas próximas eleccións galegas. Xa o anunciaron o propio Leiceaga e Gonzalo Caballero, exconcelleiro vigués e unha das caras visibles do sector máis crítico do PSdeG.
Escribe tu comentario