Silva di que os que non se absteñan "deberían renunciar á acta"
A presidenta da Deputación de Pontevedra non considera ético "non asumir a democracia e querer quedar coa acta de deputado".
A presidenta da Deputación de Pontevedra, Carmela Silva (PSOE), mostrou este xoves a súa esperanza de que "todos" os deputados do seu partido asuman a súa "obrigación democrática" de respectar a decisión do comité federal e absterse na segunda votación de investidura para permitir a reelección de Mariano Rajoy, e insistiu en que, aqueles que sentan "incómodos" con esa decisión "deberían renunciar á acta de deputado".
Nun almorzo informativo con medios en Vigo, Silva lembrou que a decisión do comité federal foi que os 85 deputados do PSOE dirían 'non' na primeira votación, e que se absterían na segunda rolda. "Teñen a obrigación democrática da abstención, pero non para apoiar a Rajoy ou ao PP, senón para permitir que rompa esta situación de excepcionalidade", incidiu.
"Espero que todos os deputados asuman a democracia, e se algún non o fai, a xestora terá que tomar decisións", sinalou. Así mesmo, reiterou que, se algún dos parlamentarios se sente "incómodo" asumindo a posición aprobada polo comité "debería renunciar á acta".
"O que non vale é non asumir a democracia e querer quedar coa acta. Non me parece que sexa ético", sentenciou.
Escribe tu comentario